Almosvalastâllâm MM-kištoh uárnejuvvojeh 19. keerdi, taan ive Uŋgar Budapestist porgemáánu 19.–27. peeivi.
Suomâ MM-juávhust láá taan ive fáárust 40 valastâlled, mii lii eenâb ko kuássin ovdil. Stuárráámuu máhđulii mere oovtâ šlaajân ađai kulmâ valastâllee Suomâ finnee fáárun almai säittišlivgiimist sehe nisonij stávránjuškiimist, movgáršlivgiimist já kuulauigâdmist. Stuárráámuuh miitaalvuorduuh láá stávránjuškiimist kištottâllee Wilma Murtost, kote lii MM-rankingist kuálmádin. Ton lasseen taan ive sust lii olgoroođij kuálmádin pyeremus puáđus ađai 480 cm. Pyereeb puáđus llii tuše Ovtâstum staatâi Katie Moonist (490 cm) já Uđđâ-Seeland Eliza McCartneyst (485 cm). Murto lii haldâšeijee miäštár sehe olgo- já sisroođij euroopmiäštárvuotâkištoin, já syeinimáánust sun vuoitij Lontoo tiimaantliiga uásikišto, mast Moon poođij nubben já moonnâm ive EM-pronssimitalist Tina Šutej kuálmádin. Nisonij stávránjuškim fiinaal lii koskoho 23. peeivi.
Meid almai säittišlivgiimist mitalân lii pyeri máhđulâšvuotâ. Oliver Helander lii šlivgim taan ive 87,32 meetterid, mii lii paje viđâdin pyeremus puáđus. Taan ive pyeremus šlivgim lii Tšeeki Jakub Vadlejchist, kote kesimáánust šlivgij 89,51 meetterid Tuurkust Paavo Nurmi Gamesist. Helander lii kuittâg šlivgim majemuin kištoin uáli pyereest. Jis verdid valastâllei majemui kištoi puátusáid, te Helander lii nubben haldâšeijee olympiavyeittee Intia Neraaj Chopra maŋa, kote lii kištottâllâm majemuu keerdi kesimáánu loopâst. Helander já Vadlejch lává meid áinooh, kiäh lává juksâm 85 meetterid syeinimáánu maŋa. Suomâ ovdâstává meid Lassi Etelätalo já Toni Kuusela, mut sunnuu miitaal vađâččij čuuvtij pyereeb puáttus ko sunnuu persovnlâš ulâttâs já meid eres valastâllei feilim. Kuusela lii šlivgim taan ive 84,37 meetterid já Etelätalo 79,93 meetterid. Säittišlivgim fiinaal tuálloo kištoi majemuu peeivi ađai porgemáánu 27. peeivi.
Käldeeh:
– Katso tästä yleisurheilun MM-kisojen ohjelma ja lähetysajat (yle.fi)
– Kommentti: Wilma Murron varjossa kytee suomalainen keihäsmitali – Tero Pitkämäen lähettämä viesti on vain yksi syistä (yle.fi)
– Yleisurheilun MM-ranking – Budapest 2023 (etusuora.com)
Kove: Andrzej (Pixabay)