Almosvalastâllâm MM-kištoh uárnejuvvojeh 19. keerdi, taan ive Uŋgar Budapestist porgemáánu 19.–27. peeivi.
Suomâ MM-juávhust láá taan ive fáárust 40 valastâlled, mii lii eenâb ko kuássin ovdil. Stuárráámuu máhđulii mere oovtâ šlaajân ađai kulmâ valastâllee Suomâ finnee fáárun almai säittileggistmist sehe nisonij stávránjuškiimist, moovgârleggistmist já kuulauigâmist. Stuárráámuuh miitaalvuorduuh láá stávránjuškiimist kištottâllee Wilma Murtost, kote lii MM-rankingist kuálmádin. Ton lasseen taan ive sust lii olgoroođij kuálmádin pyeremus puáđus ađai 480. Pyereeb puáđus llii tuše Ovtâstum staatâi Katie Moonist (490) já Uđđâ-Seeland Eliza McCartneyst (485). Murto lii haldâšeijee miäštár sehe olgo- ete sisroođij Euroopmiäštárvuotâkištoin, já syeinimáánust sun vuoitij Lontoo tiimaantliiga uásikišto, mast Moon poođij nubben já moonnâm ive EM-pronssâmitalist Tina Šutej kuálmádin. Nisonij stávránjuškim fiinaal lii koskoho 23. peeivi.
Meid almai säittileggistmist mitalân lii pyeri máhđulâšvuotâ. Oliver Helander lii leggistâm taan ive 87,32 meetterid, mii lii paje viđâdin pyeremus puáđus. Taan ive pyeremus leggistem lii Tšekki Jakub Vadlejchist, kote kesimáánust leggistij 89,51 meetterid Tuurkust Paavo Nurmi Gamesist. Helander lii kuittâg leggistâm majemuin kištoin uáli pyereest. Jis verdid valastâllei majemui kištoi puátusáid, te Helander lii nubben haldâšeijee olympiavyeittee Intia Neraaj Chopra maŋa, kote lii kištottâllâm majemuu keerdi kesimáánu loopâst. Helander já Vadlejch lává meid áinooh, kiäh lává juksâm 85 meetterid syeinimáánu maŋa. Suomâ ovdâstává meid Lassi Etelätalo já Toni Kuusela, mut sunnuu miitaal vađâččij čuuvtij pyereeb puáttus ko sunnuu persovlâš ulâttâs já meid eres valastâllei feilim. Kuusela lii leggistâm taan ive 84,37 meetterid já Etelätalo 79,93 meetterid. Säittileggistem fiinaal tuálloo kištoi majemuu peeivi ađai porgemáánu 27. peeivi.
Käldeeh:
– Katso tästä yleisurheilun MM-kisojen ohjelma ja lähetysajat (yle.fi)
– Kommentti: Wilma Murron varjossa kytee suomalainen keihäsmitali – Tero Pitkämäen lähettämä viesti on vain yksi syistä (yle.fi)
– Yleisurheilun MM-ranking – Budapest 2023 (etusuora.com)
Kove: Andrzej (Pixabay)