Amazonas uásistaatâ Brasiliast lii meridâm syeinimáánust adeliđ virgálii sajaduv
portugalkielâ lasseen meiddei 16 algâaalmugkielân. Ovdeláá virgálii sajaduv finnim
tucano, nheengatu já baniua lasseen ovdâmerkkân tagareh kielah ko apurinã,
kanamari já waiwai láá tääl finnim laavâ syeje.
Algâaalmugkielâi virgálâš tubdâstem addel pyerebijd tyejipiergâsijd siäiludiđ kielâid
mut meiddei algâaalmugij immateriallii kulttuur. Agência Brasil -uđâstoimâttuv mield
Brasilia alemuu rievti (Supremo Tribunal Federal) já aalmuglii riehtirääđi (Conselho
Nacional de Justiça) saavâjođetteijee Rosa Weber ana miärádâs tehálâžžân lävkkin
Brasilia vuáđulahâhistorjást já uásálistittee Brasilia huksiimist.
Taan miärádâs ohtâvuođâst olgosadelui meid nheengatukielân jurgâlum Brasilia
vuáđulaahâ. Nheengatukielâst láá sl. 19 000 sárnod.
Brasilia váldukielâ lii portugalkielâ, mut enâmist – iänáážin Amazonas kuávlust –
sárnojeh masa 300 algâaalmugkiellâd, main stuorrâ uási láá uhkevuálásiih tâi joba
vaarâst lappuđ ollásávt. Ovdâmerkkân apurinã-aalmugân kuleh suullân 9 500
olmožid, mut eenikielâg sárnooh láá ton juávhust árvuštâlmij mield ucceeb ko
kuálmádâs.
Käldee:
– Estado do Amazonas passa a ter 17 línguas oficiais (agenciabrasil.ebc.com.br)
Kove: DEZALB (Pixabay)