Avveel kirjerááju vitriinist láá uáinimnáál sämivaacah Helena Lampisii läigikoorist. Vaccâminstâreh láá valdum sehe Taažâ já Suomâ peln. Taažâ pele vaacah láá Kuovdâkiäinust já Vaarjâgist. Suomâ pele vaacâin láá Aanaar, Ucjuuvâ já Iänoduv minstâreh.
Kirjerááju tiäđáttâs muštâl, et Helena Lampinen lii 76-ihásâš matemaattisij amnâsij lehtor Avelist. Sun lii porgâm kuhháá maaŋgâin škoovlâin Ruávinjaargâst Ucjuuvâ räi sehe vuáđuškoovlâin já nube tääsi oppâlágádâsâin.
Kođđeem Helena Lampinen lii oppâm Elsa-enistis jo uccen. Sun lii ain lijkkum kietâtuojijd. Škoovlâst suu tyejiárvusäännin lâi ain love. Pärnin sun ain kuárui nukepihtâsijd já kuuđij vaacâid. Čájáttâsâst fáárust leijee kuobžâst lii-uv pajalist ohtâ Helena pärnivuođâ virkkaamijn. Vuosmuid sämivacâidis sun kuuđij enijnis jo vuálá loveihásâžžân.
Mottoom kooskâst Helena ooinij Aanaar kuávlu mätkitiäđáttâsâst kove vaacâin. Sun seelvâtškuođij toi minstâr já iiskâi kođđeeđ siämmáámuđusijd. Sun uusâi tiäđuid ain uđđâ minstârijn. ”Ko kuuđij muáddi čalme nubenáál, te šoodâi ain uđđâ vaccâ”, sun čielgee tiäđáttâs mield. Laapi kuávlu vaccâminstârijd sun lii uuccâm loostâin já kiirjijn já meid eres almolijn käldein, meid Laapi läänihaldâttuv arkkâduvâin. Vaacâid sun lii kođđáám jieijâs illoon, ij vyebdimân. Sämivaacâin sun lijkkoo ivnijd já toi hammiimân. Peeivi škovlâpargoi maŋa šoodâi rávhálâš vuoiŋâstempuddâ kođedijn. Iäláttâsân sirdum maŋa sust lii lamaš čuuvtij eenâb äigi kođemân.
Suu ivnáás vaccâtyejeh láá uáinimnáál Avveel kirjerááju vitriinist ain vyesimáánu 14. peeivi räi.
Käldee:
– Helenan lankakorista – lapinlapasten näyttely 14.5.2023 saakka Ivalon kirjaston vitriini-ikkunassa (www.inari.fi)
Kove: Marja-Liisa Olthuis