Stuorrâ-Britannia aalmuglii Antarktis-tutkâmlágádâs BAS (eŋg. British Antarctic Survey) totkeeh láá tutkâm máddáápiäláá Atlant váldumeerâst leijee Zavodovski suolluu iivij 2011 já 2025. Brittiliih totkeeh muštâleh, et 14 ivveest suollust iälusteijee kappeerpingviinij (Pygoscelis antarcticus) meeri lii kiäppánâm joba kyehti kuálmádâs. Totkei mield suollust iälustij maailm stuárráámus pingviinohtsâškodde, mast lijjii joba 600 000 kappeerpingviinid já 90 000 kolletieppipingviinid (Eudyptes chrysolophus).
BAS totkeeh láá selvâttâllâm suujâ kappeerpingviinij mere massiivlii kiäppánmân. Kappeerpingviineh poreh krillirapuelleid, moh kuleh meiddei päkkivállái ravâdân. Totkei mield tot ij kuittâg lah suijân kappeerpingviinij kiäppánmân, tastko päkkivállái pooškah išedeh krillirapuelleid lasaniđ.
Brittiliih totkeeh oskoh, et kappeerpingviineh láá kiäppánmin merâčääsi liegâsvuođâ pajanem keežild. Zavodovski suolluu kuávlust šoŋŋâdâh lii lieggânâm viiđáin cehhijn. Krillirapuelleeh mákkojeh pyerebeht lieggâsub čääsist, já tondiet toh vyelgih olgoláá Zavodovski suolluu kuávlust.
Veikâ kappeerpingviineh láá kiäppánmin, kolletieppipingviinij meeri vist lii stuárrum uáli ennuv. Totkei mield suijân toos lii, et kolletieppipingviinij raavâdvalje lii vijđásub ko kappeerpingviinijn. Tutkâmušâst selvânij, et kolletieppipingviineh tuođânálásávt pivdeh meiddei kuolijd sehe eres-uv rapuelleid ko tuše krillirapuelleid.
Käldeeh:
– Maailman suurin pingviinisaari tyhjenee nopeasti – myssypingviinien ruoka on hävinnyt (yle.fi)
– World’s largest penguin colony hit by ’alarming’ decline in numbers (www.bbc.com)
Kove: Gordon Leggett (CC BY-SA 4.0 / Wikimedia Commons)