Kumppiores lii jottáám kuhemuu määđhi, mii lii kuássin dokumentistum Euroopist. Kumppi šoodâi Sveeicist Graubünden kantonist ive 2021 já uážui GPS-piergâs čiäppátsis njuhčâmáánu loopâst 2022. Kumppi, mii finnij nommân M237, paasij valvees kuuvl ive 2022 kesimáánu loopâ räi, jeđe ton maŋa tot juuđij Italia rääji rasta. Love peivid tastmaŋa tot enittij Nuorttâriijkân já ain Wienân roovvâdmáánust. Kuovâmáánu pelimuddoost 2023 kumppi moonâi Uŋgar rääji rasta já Budapest lappâd, muuvsij Tonavajuuvâ já juuđij Slovakia rääji kulij. Kilomeettereh määđhi ääigi šoddii ohtsis 1 927.
Määđhis ääigi M237 juuđij sehe eennâmtuálu- já aassâmkuávlui čoođâ, joba 3 500 m ollâ váráduvâi paijeel sehe maađijij já ryevdiroođij lappâd. Lii máhđulâš, et kuumpi mätki vala juátkoo: tot ij lah kukken oovtâ kumppipopulaatiost Karpaatij váráduvâst.
Ovdil M237-kuumpi meid Alan-nommâsii kuumpi mätki dokumentistui pyereest GPS-piergâsáin. Tot juuđij ive 2009 Saksaast Vielgis-Ruošân, mast šoodâi 1 550 kilomeetter mätki. Kyehti ive maŋeláá vist Slavc-nommâsâš kumppi juuđij Sloveniast Italian, masa 1 200 kilomeetterid.
Nuorâ kuumpih kyeđih jieijâs valve 1−3 ive ahasâžžân já oceh uđđâ reeviir olssis. Oráseh joteh táválávt kuhebijd maađhijd ko niŋálâsah. Kuhes maađhij jotteem lii tehálâš kumppinaalijd, vâi geeniárbádâh piso maaŋgâpiälálâžžân.
Käldeeh:
– Longest known dispersal of wolf in Europe (www.kora.ch)
– Wolf travels 2,000 km across Europe (www.birdguides.com)
Kove: David Mark (Pixabay)