Anarâš aavis kesiluámu lii nuuhâm – Mii lohhest paasij luvâ­hánnáá taan ääigi?

Anarâš aavis kulmâ oho pištám kesiluámu lii nuuhâm. Toimâttâskodde čäliškuát oppeet uđđâsijd. Taan čallust aavis čáálá čuákánkiäsu motomijn tagarijn uđđâsijn, maid tot mudoi ličij almostittám.

Taažâ Drammenist Oslo aldasijn tábáhtui viärráás ráiđutáálu pyellim syeinimáánu 17. peeivi. Taat puálu levânij pirrâsân, já loopâloopâst tot tuššâdij paijeel čyeti aassâmvisted. Krokstadelva aassâmkuávlust álgám puálu levânij jotelávt eres vistijd korrâ piegâ keežild. Nyevt 400 olmožid monâttii pääihis pyelimist. Kihheen ij jáámmám, mut amnâsliih vahâgeh lijjii eromâš stuárráh. Puállám kuávlust tuššii rakânâsah já vuájáneh. Taat puálu lii lamaš Taažâst viärráámus paijeel 100 ihán.

Meccipuáluh láá tuššâdâm vijđes kuávluid Euroopist. Eromâšávt Espanjast, Ranskaast já Kreikkaast tuhátteh ulmuuh láá evakuistum korrâ meccipuálui keežild. Pakkâseh, koškáduvah já korrâ piegah láá levâttâm tuulâ já toohâm časkâdem eromâš hástulâžžân. Euroop union lii vuolgâttâm puálukuávloid časkâdemkirdemmašinijd, helikopterijd já puálualmaid. Äššitobdei mield košáduvah já pakkâseh lasetteh meccipuálui riiskâ. Meccipuálupuudah šaddeh ain hástulubbon, jis Euroop pakkâseh juátkojeh. Koskâ-Euroopist lii tääl jo monâmin niäljád pakkâpaje.

Jyelgipáálu MM‑kištoh nuhhii Tave-Amerikist syeinimáánust. Ton maŋa lii tábáhtum eromâšávt Ranska jyelgipállujuávhust, mii lii finnim uđđâ välmejeijen ovddii jyelgipállutääsni Zinedine Zidane. Ranska jyelgipállulitto nonnij Zinadine nomâttem syeinimáánu 28. peeivi. Zidane juátká ovdebáá välmejeijee Didier Deschamps pargoid. Deschamps valmij Ranska juávhu 14 ihheed. Zidene lii spellâm já valmim miäštárlávt Real Madridist. Välmejeijen sun stivrij juávhus kuulmâ Miäštárij liiga vuáitun miäldáluvâi ivij 2016–2018. Suu sopâmuš pištá ive 2030 MM‑kištoi räi.

Loostâ luámustâllâmääigi Anarist viättojii Aanaar-ohoh syeinimáánu 17.–26. peeivi. Ohjelmist anarâšâi uáinust merhâšitteemus lâi Anarâšah ry. ornim Anarâšâi luodâi kuorrâm ‑mokke Aanaarjäävri alne. Taat uárnejui ovddii Anarâšâi kirkkopase ‑tábáhtus sajan. Lemmest uárnejuvvojii kollekištoh, já Avelist kištottâllui čäcicrossist. Párnáid lijjii uággumtábáhtumeh já rallipeivi. Kaamâsist lâi ovdâmerkkân loddetiätukišto, kuálástem, njuárustem já loddái kođij huksim. Čuovâkovečáittusist puovtij uápásmuđ Lemmee maašinkolleruggâm historján. Aanaar-ohoh fallii maaŋgâpiäláág ohjelm nuuvt páiháláid ulmuid ko kukkeláá puátteid‑uv.

Täst ovdâskulij Anarâš aavis toimâttâs čuávu vuod uđđâsijd já váldá vuástá čalluid. Tiervâpuáttim algâttiđ uđâsčoovčâ anarâškielân.

Käldeeh:
– Huolimattomuus saattoi sytyttää Norjan tuhoisan rivitalopalon – 400 ihmistä menetti kotinsa (yle.fi)
– Europe is burning: How bad could this wildfire crisis get? (www.euronews.com)
– Zinedine Zidane appointed new France manager after Didier Deschamps’ exit (onefootball.com)
– Tapahtumat 2026 (www.inariviikot.fi)

Kove: USA-Reiseblogger (Pixabay)

Kommenteh

Čääli komment

Čääli komment.
Čääli noomâd teehin.

Luuvâ meid

Uđđâsumos uđđâseh

Suomâ, Taažâ já Kanada räije­jeh ryeš­šilij valas­tellei viisu­mijd

Suomâ haldâttâs meridij tuorâstuv staatârääđi almosčuákkimist, ete tot čavgee viisumij mieđettem ryeššiláid valastelleid. Suomâ olgominister Elina Valtosii (kok.) mield Ruoššâ kiävttá valastâllâm propaganda koskâuámmin. –...

Anarâškielâ servi almostit kyehti párnái­kirje skammâ­máánust

Anarâškielâ servi lii juátkám párnái- já nuorâikirjij almostittem. Tot almostit kyehti kirje 40‑ive juhlij ohtâvuođâst. Mainâsij ihe – Ijâttes ijjâ Vuosmuš tääl almostuvvee kirje lii párnái...

Kollekielâ-palhâ­šume mieđet­tui emeritus­professor Nils Øivind Helan­derân

Taankiärdásâš Kollekielâ-palhâšume lii mieđettum emeritusprofessor Nils Øivind Helanderân. Palhâšume mieđettui sunjin kuhes já maaŋgâpiäláág eellimpargoost sämikielâi oovdedmist. Palhâšume keigejui sunjin Helsigist skammâmáánu 11. peeivi....

Suomâ šoŋŋâ­dâh lii lieg­gân­min torvo­lii rääji paijeel

Taan ive keesi lâi vaigâd Euroopân. Koskâ- já Maadâ-Euroopist lijjii korrâ pakkâpajeh, juuvah kuškii já sehe elleeh já ulmuuh killájii. Pakkâseh maksii Euroopân joba...

Sämikielâ­liih Muččâ­dumos juovlâ­lavluuh ‑tilálâš­vuođah uárne­juv­vojeh uđđâ päikki­kuu­dijn

Sämikielâliih muččâdumos juovlâlavluuh lávlojeh oppeet skammâ- já juovlâmáánust pirrâ Suomâ. Taaijuv tilálâšvuotâ uárnejuvvoo vuosmuu tove meiddei Kuopiost já Lappeenrantast, muštâl Oulu pispekodde tiäđáttâsâstis. ”Sämikielâliih juovlâlavluuh...