Taanihásiih euroviisuh uárnejuvvojeh Wienist Nuorttâriijkâst Wiener Stadthallest. Tijmái euroviisui vyeittee lâi JJ adai Johannes Pietsch, kote puovtij kištoid jieijâs enâmân pitáinis Wasted Love. Taat lii kuálmád tohe ko euroviisuh uárnejuvvojeh Nuorttâriijkâst. Ovdebáá tove ive 2015 Conchita Wurst vuoitij viisuid pittáin Rise like a Phoenix. Vuosmuu keerdi vuáittu moonâi Nuorttâriijkân ive 1967.
Taan ive Suomâ ovdâsteijen euroviisuin lávluv Pete Parkkonen já Linda Lampenius. Sunnuu pitá nommâ lii Liekinheitin, sämikielân Tullârussoo, já mune-ennustusâi mield suoi taištâlává joba vuáitust. Eres kievrâ vyeitteeiävtukkâsah láá viäđučaskemist lamaš Kreikka, Ranska, Tanska já meid Israel.
Taan ive Espanja, Irland, Island, Slovenia já Vuáládâhenâmeh iä lah vuolgâttâm ovdâstusâs kištottâlmáid, tastko Israel uásálist euroviisuid. Viže kuáská Israel vollitmân Gazan. Meddâlpäcimist huolâhánnáá ovdâmerkkân Vuáládâhenâmeh liijká vuolgâtteh euroviisuid televisiost.
Vuosmuš semifiinaal uárnejuvvoo majebaargâ já nubbe semifiinaal tuorâstuv. Suomâ kištottâl majebaargâ semifinalist. Fiinaal uárnejuvvoo lávvárduv. EBU statistiik mield puoh enâmijn 95 000 lippud láá vuobdum sehe semifinaláid já finalân. Taan tove uásálisteeh láá vuolgâttum 27 enâmist.
Ovdil Yle lii vuolgâttâm sämikielâlii čielgim sehe semifinalijn já finalijn.Taan ive tuše fiinaal čielgejuvvoo kyevti sämikielân. Taan ive anarâš toimâtteijee já ráp-artist Mikkâl Morottaja seelvât euroviisuid anarâškielân já toimâtteijee Xia Torikka tavesämikielân.
Anarâš aavis fattij Mikkâl Morottaja savváid eidu ovdláhháá ko sun lii älgimin valmâštâllâđ euroviisupargoid. Sun iätá, et lii uáli jo jiäráskittee leđe tággáár pargoost fáárust vuosmuu tove, veik sun lii ovdil lamaš orniimin stuárráábijd tábáhtusâid eres roolist.
– Eromâš taanihásii sämikielâ čielgiimist lii tot, et puoh tábáhtuvá Aanaar maaŋgâtoimâstudiost, Mikkâl muštâl.
Ovdebái ivij sämikielâ selvâtteijeekyevtis lává ain mađhâšâm Helsigân já suoi lává čokkám Pasilast. Taan ive meiddei suomâkielâ čielgejeijee seelvât euroviisuid Suomâst ige maađhâš pääihi oolâ.
Mikkâl muštâl, et taan tove ij lah nuuvt korrâ pargo čäälliđ enâmij postâkoortâid vuolgâttâs várás, tastko sämikielân selvâttuvvoo tuše fiinaal. Liijká ferttee selvâttiđ äigitaavluid já vuáváđ pyereest kietâčalluu.
Mikkâl muštâl, et keččeeh láá taan-uv tove pirrâ Säämi já tave-enâmijn. Sunnuu pargon Xiain lii selvâttiđ euroviisuid sämmilii uáinu čoođâ.
– Ige jieš pyevti kyedittiđ oovtâgin eennâm, sun smietâd.
Vuosmuš semifiinaal álgá onne tijme 22 Suomâ ääigi. Tom puáhtá keččâđ TV1:st, Yle Areenast, Yle-heiviittâsâst já yle.fi:st.
Käldeeh:
– Xia Torikka já Mikkâl Morottaja lává Euroviisui uđđâ sämikielâg läiđejeijeeh – taan tove tuše fiinaal lii sämikielân (yle.fi)
– Officiële aftrap songfestivalseizoen: ’Kijkcijfers zullen drastisch lager zijn’ (nos.nl)
Kove: Quejaytee (Wikimedia Commons)