Lávvárduv juovlâmáánu 6. peeivi täsivääldi president Alexander Stubb já suu kálgu Suzanne Innes-Stubb ornijn jiečânâsvuođâpeeivi juhlevuástáväldim Presidentlanneest. Taan ive vuástáväldimist juhlui škovlim já čuovviittâs syemmilii ohtsâškode huksejeijen.
Presidentlaanan lijjii puávdejum nyevt 1 800 kyessid pirrâ Suomâ. Kuosij juávhust lijjii eromâšávt máttááttâssyergi áárvustonnum áámmátulmuuh. Presidentpaarâ lâi meid povdim juuhlán kuosijd, kiäigijn suoi láin teivâm päikkieennâm mađhijdis ääigi. Puávdejum kuosijn paijeel peeli juhloi jiečânâsvuođâpeeivi vuosmuu tove Presidentlane vuástáväldimist.
Peeivi kuosijn aktiivkarrieeris eidu lopâttâm lávloo Katri Helena peesâi tiervâttiđ presidentpaarâ vuosmužžân.
Vuordum kyessi lâi meiddei president eeči Göran Stubb myersseinis Pirkko Mannolain. Göran Stubb lii Suomâ historjást nubbe president eeči, kote lii peessâm tiervâttiđ jieijâs alge presidentin. Göran Stubb lâi tutâvâš toos, et alge lii piergim aaibâs pyereest. Moonnâm ive sun lâi pyeccee ige peessâm juuhlán. Taan tove suu myerssee lâi pieijâm suu sierriittâsân ovdil juhlij, amas taavdah volliittiđ.
Sämmilijd vuástáväldimist ovdâstij Sämitige nubbe värisaavâjođetteijee Tuomas Aslak Juuso.
Faalâdmij máhumaailm poođij taan ive Nuorttâ-Suomâst
Jiečânâsvuođâpeeivi faalâdmij máhumaailm lâi taan tove nuorttâsyemmilâš. Fáárust lijjii ärbipurrâmušah eromâšávt Savost já Kärjilist. Faalâdmijn kuávdáš äššin lijjii luánápuovtâdem já páihálij smavvâpuovtâdeijei máttu. Faalâdmeh lijjii valmâštum iänááš päikkieennâmlijn amnâsijn tego muorjijn, jävrikuolijn já šaddoin.
Juhlij rääsih lijjii taan ive vielgisruánááh, já kukáh lijjii eereeb iärrás vielgis amarylliseh, ruusuh já juovlâtääsnih. Lase ruánáá elementeh lijjii viežžum luándust. Uási tain lâi nurrum president kesivisteest Kultarantast.
Suomâ veteraanij juhle uárnejui jo juovlâmáánu 2. peeivi
Täsivääldi president Alexander Stubb já suu kálgu Suzanne Innes-Stubb algâttáin Suomâ jiečânâsvuođâ juuhlijd jo majebaargâ juovlâmáánu 2. peeivi. Presidentpaarâ lâi koččom Presidentlanneest tollum juhletilálâšvuotân Suomâ jiečânâsvuođâ kunneekuosijd: sođij veteraanijd já lottaid já eres suátisuhâpuolvâi ovdâsteijeid.
Veteraanij já sii omâhái já veteraanij ovdâsteijei tuoivui mield vuástáväldim uárnejui peivijuhlen. Tánávt maaŋgah kunneekyesih pessii uásálistiđ juuhlán, já näävt lâi meid eenâb äigi savâstâlmân ollâahasij kuosijgijn. Juuhlán uásálistii meid president Tarja Halonen já professor Pentti Arajärvi, njunošminister Petteri Orpo, staatâvarij minister Riikka Purra, máttááttâsminister Anders Adlercreutz, ovdâskode värisahâtuállee Paula Risikko já Piäluštâsvuoimij hovdâ Janne Jaakkola.
Käldeeh:
– Presidentkanslia tiäđáttâs 27.11.2025
– YLE TV-vuolgâttâs Presidentlanneest 6.12.2025
Kove: Lauri Heikkinen / Täsivääldi president kanslia