Suomâ täsivääldi president Alexander Stubb mieđettij ohtsis nelji palhâšume Anarân jiečânâsvuođâpeeivi 6.12.2025. Kyehti kunneemeerhâ láá mieđettum anarâššáid já anarâškielâ pyerrin porgum pargoost.
Suomâ Leijoon ánsuristâ mieđettui toimâtteijee Anja Kaarretân. Sun lii porgâm eellimpargoos anarâškielâ toimâtteijen YLEst, kost sun lii porgâm ive 1985 rääjist já annaam huolâ tast, et anarâškielâ lii kullum. Toimâttâh huámášit, et suu eromâš ánsun lii lamaš finniđ vuod anarâšâid sárnuđ anarâškielâ, já sun lii eromâšávt ovdedâm YLE arkkâduv, nuuvt et puáris vuolgâttâsah já meid puáris jienah láá ain kuullâmnáál.
Kove: Anja Kaarret
Anarân mieđettui nubbe‑uv Suomâ Leijoon ánsuristâ. Taat poođij tuotâvuotâ‑ já sovâdâttâmkomissaar Irja Jefremoffân, kote lii porgâm merhâšittee pargo sehe Aanaar kieldâst já kulttuur‑ já mađhâšemsyergist já ruokâsmittám sämmilijd uásálistiđ Sämmilij tuotâvuotâ‑ já sovâdâttâmkomissio prosesân.
Suomâ Vielgis Ruusu I luoka miitaal mieđettui Ritva Kangasniemin kuhesáigásii já vaikutteijee pargoost nuorâi pyerrin. Ritva Kangasniemi lii porgâm merhâšittee pargo anarâškielâ pyerrin, já suu pargoost lii lamaš njuolgâ merhâšume toos, et Aanaar kieldâst sämikielâlij ulmui meeri lii stuárrum. Kangasniemi lii porgâm eellimpargoos kielâpiervâlist, já sun lii lamaš aalgâ rääjist šoddâdmin anarâškielâlii kielâsuhâpuolvâ.
Kove: Ritva Kangasniemi
Nubbe-uv Suomâ Vielgis Ruusu I luoka miitaal mieđettui Anarân. Tom finnij Aanaar kieldâ pargee Pirkko Mäenpää, kote lii aktiivlávt ovdedâm nuorâipargo nuuvt kieldâst ko ubâ Laapi kuávlust.
Anarâš aavis fattij Anja Kaarret já Ritva Kangasniemi savváid. Suoi kuohtuuh láin čuuvtij olâttum sunnui mieđettum kunnest iäváge lamaš tom vyerdimingin. Suoi illá oskoin ko kuuláin. Suoi kuohtuuh kuuláin palhâšumestis uápisulmui peht, já taah uápisulmuuh vuod láin luuhâm ääšist Lapin Kansaast. Ritva Kangasniemi finnee palhâšuumees Aanaar kieldâ peht uđđivemáánust. Anja Kaarret ij lam vala taam čälidijn kuullâm, maht já kuás sun finnee palhâšuumees.
Anarâš aavis tuáivut ennuv luho palhâšume uážžoid.
Kove: Suomâ Vielgis Ruusu já Suomâ Leijoon riitaarkodeh