Cree-algâaalmugân kullee mediaolmooš Buckley Petawabano jaamij roovvâdmáánu 19. peeivi 77‑ihásâžžân.
Petawabano poorgâi viššâlávt ton oovdân, ete algâaalmugij jienâ kulluuččij kanadalii mediast. Sun poorgâi elleekuvijguin, televisioin, teatteráin já radioin. Petawabano pargo tiet uđđâ creetaiđâreh já ‑mediaulmuuh movtáskii jyehiđ jieijâs mainâs jieijâs jienâiguin.
Petawabano lâi ohtâ vuosmuin eenouin (ärbivuáválâš nommâ Jamesluovtâ creeid), kote čaittâlij Kanada televisiost. 1970-lovo aalgâst sun čaittâlij Pete Gawa ‑nommâsii ulmuu televisiorááiđust Adventures in Rainbow Country. Ive 1976 sun čaittâlij elleekooveest Cold Journey (Kolmâ mätki), mii maainâst 15-ihásii creekaandâst, kote kámppádâl jieijâs identiteetáin asâttâhškoovlâ já creelii eellim kooskâst. Maainâs vuáđuduvá uásild Petawabano jieijâs fiäránáid. Čaittâlem lasseen ive 1977 Petawabano poorgâi kovvejeijen elleekuuvijn Amisk já Cree Way.
Petawabano ovdedij meid viestâdemtooimâ. Sun oovdânpuovtij ive 1971 Kanada radio-, televisio‑ já viestâdemtoimâkoodán CRTC:n iävtuttâs algâaalmuglijn vuolgâttâsâin. Ton áánsust ive 1981 vuáđudui Cree Radio Network, mii tááláá ääigi tobdoo noomáin James Bay Cree Communications Society. Tot lii creelâš radio-ornijdume, mii tuáimá Jamesluovtâ kuávlust Kanada Quebecist.
Creelii tyeje já kulttuur ovdedeijee seervi Cree Native Arts and Crafts Association toimâjođetteijee Dale Cooper muštâlij Petawabano äärbist.
– Sun lâi eenâb ko čaittâleijee. Sun lâi meid jođetteijee, elleekuuvij rähtee já mainâsteijee. Suu ärbi juátká eellim puoh ton korrâ pargo tiet, maid sun lii porgâm. Eromâšávt tondiet, ete sun puovtij creeid ubâ Kanada tiäđulâšvuotân. Lii uáli jo tehálâš, ete creeh ovdâstuvvojeh mediast, Cooper eeđâi.
Ive 2013 Cree Native Arts and Crafts Association palhâšij Petawabano Cree Legend Award ‑palhâšuumijn. Maŋeláá servi vuáđudij meid Buckley Petawabano Award.
Käldeeh:
– Cree trailblazer Buckley Petawabano, pioneer in Indigenous media and film, dead at 77 (www.cbc.ca)
– Buckley Petawabano (www.cnaca.ca)
Kove: Cree Native Arts and Crafts Association