Australialii spellâirâttâs Team Cherry uđđâ videospellâ Hollow Knight: Silksong almostui čohčâmáánu 4. peeivi tijme 17 Suomâ ääigi. Speelâ almostittem vuordii miljovneh ulmuuh.
Silksong lii jotkâuási Hollow Knight ‑speelân, mii almostui ive 2017. Algâalgâlii speelâst láá vuobdum paijeel 15 miljovn pittád. Tot lii uáli jo merhâšittee meeri, tastko Team Cherry ‑irâttâsân kuleh tuše kuulmâs: taaidâr Ari Gibson, sundáttâllee William Pellen já ohjelmistee Jack Vine. Sii lasseen Christopher Larkin västid speelâ jienâin já muusikist.
Vuosmuuh tiäđuh Silksongist pottii ive 2019. Tastmaŋa ulmuuh láá moovtâ vuárdám speelâ. Steam-palvâlusâst, mii lii maailm stuárráámus viermikävppi tiäturân uáivildum videospelláid, Silksong lâi taan ive puoh enâmustáá vuordum videospellâ. Porgemáánu pelimuddoost tot lâi 4,8 miljovn spellee tuoivâlistoost.
Motomeh eres spellâirâttâsah meridii sirdeđ jieijâs speelâ almostittem, amas speelah pääcciđ Silksong suoivui. Já ko Silksong viijmâg almostui, te Steam já videospeelâi eres viermikäävpih joskii toimâmist, tastko nuuvt maaŋgâs irâttii uástiđ speelâ siämmáá ääigi.
Tivreh, syeligâsvuođah já mučis maailmeh
Silksong spellee huáđđon lii Hornet-nommâsâš tivre, mii lâi fáárust jo vuosmuu speelâst. Hornet lii valdum faŋgân omâs enâmân, kost tot ferttee tutkâđ mučis maailmijd, selvâttiđ syeligâsvuođâid, njuškođ já kuárŋudiđ sehe tuárruđ eres tivrijguin.
Silksong lii nuuvt kočodum tuáriskulij jurâttettee spellâ (eŋg. side-scrolling video game). Tast kamera čáittá spellâmaailm tuárrást, já spellee huáđđoo, eres huáđđooh já piirâs lihâdeh čižetpel já uálgispel. Veikâ Silksong oro lemin 2D-spellâ ađai kyevtuulâtlâš spellâ, te jieš maailm lii kuittâg kuulmâuulâtlâš. Speelâ taaiđâ lii sargum kieđâi.
Speelâ puáhtá spellâđ tiäturáin já váldukonsoláin (Nintendo Switch, Sony Playstation, Microsoft Xbox). Tot lii rahtum Unity-spellâmoottoráin. Steamist speelâ láá tääl árvuštâllâm paijeel 40 000 olmožid, já paijeel 90 prosentid árvuštâlmijn láá positiivliih. Negatiivliih árvuštâlmeh kyeskih iänááš speelâ vädisvuotân.
Käldeeh:
– Miljoonat ovat odottaneet tätä Silksong-peliä seitsemän vuotta, ja tänään kello 17 odotus päättyy (yle.fi)
– Hollow Knight: Silksong is the biggest game in the world today, made by a tiny team in Adelaide (www.abc.net.au)
– Team Cherry tiäđáttâs
Kove: Team Cherry