Anarâš aavis muštâlij syeinimáánu 23. peeivi, ete Rosebud Sivullinen ‑kirjekävppi kárttá varriđ meddâl Helsig ollâopâttuv omâstem Kaisa-táálust Helsig kuávdáást. Talle lâi tiäđust, ete kirjekäävpi sajan lii puátimin ”stuorrâ aalmugijkoskâsâš irâttâs”, mutâ ollâopâttâh ij halijdâm muštâliđ ääšist eenâb. Tääl lii čielgâm, ete tuot irâttâs lii ruátálâš Rusta.
Rusta lii hälbikävppiráiđu, mii tuáimá Ruotâ já Suomâ lasseen Taažâst já Saksaast. Suomân tot poođij ive 2018, já tääl tast láá Suomâst paijeel 40 kävppid, tavemussân Ruávinjaargâ kävppi.
Helsig ollâopâttâh muštâl, ete Rusta Finland Oy já Helsig ollâopâttuv ruttâráájui koskâsâš sopâmuš puátá vuáimán ive 2026 aalgâst. Rusta tiäđáttâs vist muštâl, ete uđđâ kävppi lekkâs kiđđuv já ete tobbeen vuábdojeh pääihi pyevtittâsah, anotävireh, reemoontpyevtittâsah já rijjâääigi tävireh.
– Mij uusâim kuhháá rievtis čuávdus Helsigist já lep eromâš tuđâvááh haavâ olášuumân já sajadâhân, iätá Rusta Suomâ-hovdâ Mats Kotka.
Kirjekävppi Sivullinen tooimâi Kaisa-táálu kátutääsi kävppisaajeest ive 2021 rääjist. Kirjekäävpi lasseen saajeest tooimâi vistekálvukävppi Masku. Rusta puátá sehe Sivullinen já Masku sajan. Kävppisaje lii ohtsis suullân 2 400 neljihâšmeetterid.
– Kátutääsi kävppisaje laiguuttem šoodâi oppeet äigikyevdilin ton maŋa, ko Masku almottij aiguinis luoppâđ jieijâs uásist. Mii ohtsâšpargo Rosebud Books ‑irâttâssáin juátkoo ain Helsig ollâopâttuv Tiedekulmast, já tuáivu mield mij pyehtip laiguuttiđ sijjân saje meid puátteevuođâst, iätá kiddodâhjođetteijee Jaana Ihalainen Helsig ollâopâttuv tiäđáttâsâst.
Rosebud Sivullinen äššigâsah já Rosebud Books toimâttâsjođetteijee Hannu Paloviita lijjii soroliih tast, ete kirjekävppi kaartâi varriđ. Káávpán occoo uđđâ saje, mutâ tast ij lah vala eenâb tiätu.
Käldeeh:
– Rusta korvaa kirjakaupan Helsingin yliopiston vuokralaisena (yle.fi)
– Suomen valikoimaltaan suurimman kirjakaupan Rosebud Sivullisen tilalle tulee Rusta (www.hs.fi)
– Kaisa-talon katutason liiketilan vuokralaiset vaihtuvat (www.helsinki.fi)
Kove: Green Yoshi (Wikimedia Commons)