Rosebud Sivullinen -kirjekäävpi láiguadeleijee lii ciälkkám luovâs kirjekäävpi láigusopâmuš Helsig Kaisa-táálust. Sopâmuš nohá uđđâivemáánust 2026. Ääšist muštâlij syeinimáánu 18. peeivi Rosebud Books toimâttâsjođetteijee Hannu Paloviita irâttâs Facebook-sijđoost.
– Tääl lii olmâ äigi oovdânpyehtiđ eromâš stuorrâ kijttosijd ton torjust já movtijditmist, maid mij lep tist finnim majemui mánuppoojij. Takkâ, kirjesyergi pargeeh já eromâšávt mii fiijnâ, oskoliih äššigâsah! Lii sorolâš, ete mii láigukoskâvuotâ, mii aalgij Helsig ollâopâttuvváin 90-lovvoost, nohá tánávt, Paloviita čáálá.
Sivullinen lii toimâm Kaisa-táálu kátutääsi kävppisaajeest ive 2021 rääjist. Eidusâš láiguadeleijee lii Helsingin Yliopistokiinteistöt Oy (Helsig Ollâopâttâhkiddoduvah). Ton toimâttâsjođetteijee já Helsig ollâopâttuv kiddodâhjođetteijee Jaana Ihalainen kommentistij ääši tuše uánihávt tekstâviestáin. Suu mield Rosebudân lii fallum nubbe saje sopâmuš nuuhâm maŋa, já ohtsâšpargo irâttâssáin juátkoo Tiedekulmast.
Tiedekulma lii Helsig ollâopâttuv saje, mii lii áávus puohháid. Tobbeen uárnejuvvojeh sierâlágáneh tieđâ- já savâstâllâmtábáhtusah. Rosebud västid Tiedekulma Shop -käävpist.
Paloviita muštâl, ete saje, mii irâttâsân lii fallum, lii Vuorikatust. Tot já Kaisaniemenkatu, kost Kaisa-táálu lii, láá aldaluvâi Helsig kuávdáást. Vala ij lah vises, kuus kirjekävppi loppâloopâst värree. Rosebud lii kuittâg jo ucâmin uđđâ toimâsaje.
– Jis kuávdáást pastaččij kavnâđ saje, te tot ličij tiäđust-uv tááláá äššigâskode tááhust ideaal, Paloviita iätá.
Kirjekävppi lii tehálâš eromâšávt uccâ kuástideijeid
Rosebud Books lii kirjekuástideijee já kirjekävppiráiđu, mast láá vittâ kirjekäävpi Helsigist já ohtâ kirjekävppi Kuopiost. Rosebud Sivullinen lii Suomâ stuárráámus kirjekävppi valjiittâs mield. Tobbeen láá paijeel 62 000 kirjed. Suomâ stuárráámus kirjekävppiráiđu vist lii Suomalainen kirjakauppa, mast láá paijeel 50 kirjekävppid pirrâ Suomâ.
Toimâttâsjođetteijee Hannu Paloviita mield Rosebud Sivullinen lii lamaš tehálâš uccâ kuástideijeid.
– Tot lii lamaš áinoo saje, kost maaŋgâi uccâ kuástideijei kirjeh, eromâšávt tiätukirjeh, láá lamaš pyereest uáinusist. Ton tááhust taat lii monâttâs mijjân sehe ubâ kirjesuárgán já uccâ kuástideijeid. Tot väivid muu, Paloviita iätá.
Tast, et kii puátá Kaisa-táálun kirjekäävpi sajan, lii jo mottoomlágán avâštâs. Paloviita muštâl, ete ollâopâttuv ohtâvuotâolmooš lâi tolebáá kiđđuv vahâgist ettâm, ete kirjekäävpi sajeh kiäsutteh ”stuorrâ aalmugijkoskâsii irâttâs”. Paloviita osko, ete láigusopâmuš tain irâttâssáin lâi jo masaba soppum, já ráđádâlmeh Rosebudáin tuállojii tuše hámálâšvuođâ tiet.
– Mij liččijm tiäđust-uv halijdâm juátkiđ tii fiijnâ soojijn pisovávt. Taan tove ”stuorrâ aalmugijkoskâsâš irâttâs” ánsášiš soojijd kuittâg pyerebeht ko mij, Paloviita čaalij Facebook-čalluustis.
Käldeeh:
– Jättikirjakauppa Helsingin Kaisaniemessä joutuu lopettamaan – yliopisto otti tilalle ”suuren kansainvälisen toimijan” (yle.fi)
– Kaisa-talossa lopettavalle Rosebudin kirjakaupalle on tarjottu uutta tilaa, kertoo toimitusjohtaja (www.hs.fi)
Kove: KLS (Wikimedia Commons)