Äijih lii cokkiittâm koške enâmijd viijđáht Laapist. Laapi piäluštemlágádâs lâi časkâtmin kuuđâ sierâ puálu koskoho ehidispeeivi, muštâl Laapi piäluštemlágádâs tiäđáttâsâstis.
Piäluštemlágádâs lâi koskoho ehidispeeivi časkâtmin siämmáá ääigi tuulâ Ruávinjaargâst, Kolarist, Suovâkuoškâst, Ucjuuvâst, Muoniost já Tuárnusist. Tai sojij lasseen suovâ lii oinum pirrâ Laapi. Suovâkuoškâ já kyehti Kiemâjäävri puálu lijjii monnjâkocceemmuddoost. Tai puálui lasseen meid Pellost já Ucjuuvâst lijjii monâmin časkâdum puálui kocemeh.
Ucjuuvâ tullâpuáluh láá suullân 50 kilomeetter siste nubijnis. Nubbe Kiemâjäävri puáluin lii nyevt kuulmâ hehtaar stuárusâš.
Laapi paijeel jottáám aldâkkâsah láá ovdláhháá-uv cokkiittâm maaŋgâid meccipuáluid pirrâ Laapi. Ovdebáá tiäđáttâs mield mecci lii puállám meid Ruávinjaargâst, Suovâkuoškâst, Avelist, Kiemâjäävrist, Pellost já Kittâlist, mut taah puáluh láá jo časkâttum.
Räjikosáttâslágádâs já Piäluštâsvyeimih láá išedâm časkâdempargoin helikopterijgijn. Meid maaŋgah rijjâpuálukoddáliih láá puáttám išán.
Piäluštemlágádâs muštoot-uv, et ávustuulâ cokkiittem lii tääl äŋgirávt kieldum meccipuálu-uhke keežild. Ávustullân annoo puohlágán tuulâi cokkiittem, mast tullâ puáhtá levâniđ jo-uv acâkkistmáin teikâ eennâm peht. Meiddei tubákkijd kalga časkâdiđ pyereest.
Piäluštemlágádâs tuáivu, et suovâaiccâmij tieđetteijeeh almottiččii čielgâsávt, kogobeht suovâ uáinoo. Tärhis saje iššeed puálu kavnâm já časkâdempargoi algâttem.
Äijihšooŋah láá ain vyerdimist Laapi eennâmkoddeest meid puáttee oholoopâ ääigi.
Käldeeh:
– Maastopalojen sammutustyöt jatkuvat Lapissa (pelastustoimi.fi)
– Lapin pelastuslaitoksella kiireinen vuorokausi (pelastustoimi.fi)
Kove: Albrecht Fietz (Pixabay)