Tiira-loddetiätupalvâlusân čallum tiäđui mield taan kiiđâ lii kullum ijjâlode kiihâmlávlum maaŋgâ saajeest Suomâst. Majemustáá ijjâlodeh lijjii eenâb ko tääl ive 2017.
Eromâš ennuv ijjâlodeh láá kullum algâivveest 2025 Koskâ- já Nuorttâ-Suomâst. Tavveen vist ijjâlodeh iä oro lemin nuuvt ennuv ko majemui iivij. Nube tááhust toh älgih kiihâmlávlum tavveen maŋeláá ko mäddiláá, nuuvt ete aiccâmušâi meeri sáttá vala lasaniđ kiiđâ ääigi. Maadâ-Suomâst ijjâlodde lii taan ääigi viehâ härvinâš lodde, ige tile lah taangin ive muttum tađe pyerebin.
Ive 2024 ijjâlodeh lijjii uáli jo uccáá pirrâ Suomâ, pic tavveen, kost ijjâloddeihe lâi aaibâs pyeri. Tave-Suomâst ijjâloddenääli ij lah kiäppánâm nuuvt čielgâsávt ko mäddin.
Veikkâ taan kiiđâ ijjâlodde lii kullum maaŋgâ saajeest Suomâst, te šlaajâ nääli kiäppánmist muštâl tot, ete iivij 2007 já 2017 kooskâst lijjii joba čiččâm ihheed, kuás ijjâlodeh lijjii eenâb ko taan ive. Ive 2009 lâi uáli jo pyeri ihe ijjâlode tááhust. Ko verdid taam algâive ihán 2009, te meeri lii tääl tuše viđâdâs. Ubânâssân ijjâlode nääli lii-uv čuuvtij kiäppánâm. Ijjâlode náálán vaaigut enâmustáá muldesäpligij meeri, mut šlaajâ lii kiäppánâm Suomâst meid puáris meecij kiäppánem já meccikuávlui pieđgânem tiet.
Käldee:
– Paras helmipöllökevät lähes kymmeneen vuoteen (www.birdlife.fi)
Kove: Stefan Berndtsson (Wikimedia Commons)