Tutkâm- já ovdedemjuávkku Divvun lii vuáittám ive 2024 innovaatiopalhâšume, mon juovij Taažâ arktisâš ollâopâttâh ađai UiT cuáŋuimáánu 3. peeivi Tromssaast. Divvun lii ovdedâm jienâdemohjelm juulev- já maadâsämikielâ várás. Nuuvt kočodum sárnumsyntees taha máhđulâžžân teevstâ muttem sárnum kiellân.
Divvun-juávhu pargo áánsust tiätumašineh láá ”sárnuškuáttám” sämikielâ. Juávkku lii ráhtám infrastruktuur, mon lii máhđulâš kevttiđ meid eres ucceeblovokieláid sehe Tave-enâmijn já eres kuávluin.
UiT mield Divvun lii porgâm pälgisliäkkoo já innovatiivlii pargo, mii lii lekkâm uđđâ máhđulâšvuođâid kielâkevttimân taan digitaallii ääigi. Tot lii tehálâš Taažâ virgálii kielâpolitiik olášutmist. Sämikielâ sárnumsyntees fáálá uđđâ máhđulâsvuođâid sämikielâi kevttimân uđđâ ohtâvuođâin. Divvu-juávhu áánsust sämikielah láá sirdâšuumin sárnumteknologisii äigipajan.
UiT juovij tilálâšvuođâst ohtsis kuttâ palhâšume jieškote-uvlágánijn kategoriain.
Meid anarâškielâ lii algâttâlmin jienâsynteespargo puáttee keesi. Taat tábáhtuvá ohtâvuođâst Divvun-juávhoin, Helsig ollâopâttuvváin já Aalto-ollâopâttuvváin.
Käldeeh:
– Divvun vuoitán innovašuvdnabálkkašumi (www.nrk.no)
– Innovasjonspris til samisk talesyntese (www.nrk.no)
– Her er vinnerne av UiT-prisene 2024 (uit.no)
Kove: David Jensen / Taažâ arktisâš ollâopâttâh