Ameriklâš lávlooBruce Springsteen almostit kesimáánust čiččâm uđđâ albumid. Taam Springsteen jieš tieđettij Instagramist. Tracks II – The Lost Albums almostuvá suullân kesimáánu 27. peeivi. Taan albumist láá 82 uđđâ pittád, main 74 iä lah val ovdil kullum kosten. Pitáh láá päddejum Springsteen päikkistudiost ivij 1983–2018.
75-ihásâš Springsteen čielgee videost, et sun lii maŋgii kuullâm tast, et sun ij motomij mielâst lamaš produktiivlâš 1990-lovvoost. ”Tuođânálásávt mun porgim ubâ ääigi”, sun iätá. Puátusijd sun vuorkkij pyereest. Koronapandemia ääigi sun poltoi vuárháidis já porgâškuođij materiaalijdiskijn. Sun poorgâi loopân puoh tom, mii sust lâi pááccám koskân.
Motomeh pitáh The Lost Albums -albumist lijjii jo aaibâs valmâšeh, já toh lijjii jo miksajum-uv, mut toh iä lam kuássin almostum. Čiččâm albumid almostuveh oovtâst 100-sijđosijn kirjijn.
Tracks II čuávu Tracks-album, mii almostui 1998. Tast lijjii nelji CD, main lijjii 66 uđđâ pittád, moh iä lam ovdil soittum.
Bruce Springsteen annoo puoh merhâšitteemussân artistin ameriklii pophistorjást. Sun šoodâi tobdosin 1975 kuálmádáin albumijnis Born to Run, já muáddi ive maŋeláá sust almostui Hungry Heart, mii lâi hitti maaŋgâ enâmist.
Meiddei The River šoodâi hittin ubâ Euroopist. Suu čiččâd album Born in the USA lâi suu karrieer pivnohumos skiärru, já eromâšávt tast leijee pitáh I’m on Fire, Glory Days, My Hometown já Dancing in the Dark.
Konsertturnee puátá Euroopân
Springsteen lii puátimin konsertturneen Euroopân puáttee keesi. Sun tuálá 16 konsertid 14.5.–3.7. kuuđâ enâmist. Suu konsertráiđu álgá kulmáin konsertáin Stuorrâ-Britanniast Manchesterist (14.5, 15.5. já 20.5.), já maŋeláá sun konsertist meid kuohtii Liverpoolist (4.6. já 7.6.). Ranskaast sun paijaan läävdi oolâ kuohtii Villeneuve d’Ascqist (24. já 27.5.) já ohtii Marseillest (31.5.). Saksaast suu konserteh uárnejuvvojeh Berlinist (11.6.), Frankfurtist (18.6.) já Gelsenkirchenist (27.6.). Tšeekist sun tuálá oovtâ konsert Prahast (15.6.). Espanjast sun konsertist kuohtii San Sebastianist (21.6. já 24.6.). Suu konsertturnee nohá Italian, kost sun konsertist kuohtii Milanost (30.6. já 3.7.).
Lippuvyebdimij mield suu konsertijn lii val mottoom verd saje, mut ennuv liipuh láá jo vuobdum.
Käldeeh:
– Bruce Springsteen komt met zeven nieuwe albums (nos.nl)
– Bruce Springsteen tickets (www.viagogo.nl)
Kove: Raph_PH (Wikimedia Commons)