Laapi pyereestvaijeemkuávlu tieđettij 3.12.2024 nubástusâin Čevetjäävri tiervâsvuođâpalvâlussáid. Tiäđáttâs mield Čevetjäävrist iälá puátteevuođâst tiervâsvuođâtipšoo tuše ohtii mánuppaajeest ige innig kuohtii ohhoost, já škovlâtiervâsvuođâhuolâttâs ääših tipšojeh Čevetjäävri škoovlâst äigiväridem peht. Ton lasseen Čevetjäävrist lopâttuvvojeh puoh. Miärádâs poođij olâttâssân sehe Sämitiigán já Nuorttâlij sijdâčuákkimân.
Nubástusah liččii kolgâm puáttiđ vuáimán uđđâivemáánu 1. peeivi 2025. Návt ij kuittâg keevvâm, tastko Sämitigge já Nuorttâlij sijdâčuákkim tohhii áánnum Laapi pyereestvaijeemkuávlu virgehaldâšeijeid já merideijeid, et sij keesih meddâl Čevetjäävri tiervâsvuođâpalvâlusâi kääržidmân kyeskee miärádâs já čonâdâteh turviđ vuáđupalvâlusâid puátteevuođâst ubâ sämikuávlust – meiddei tuárispeln leijee siijdâin.
Laapi pyereestvaijeemkuávlu tieđettij 19.12.2024, et ive 2025 Čevetjäävri tiervâsvuođâpalvâlusah pisoh suullân siämmáážin ko ive 2024:
– Tiervâsvuođâtipšoo iälá Čevetjäävrist jyehi ohhoost, p. 040 162 8763 (puáhtá suáittiđ argâpeeivij tme 10–11).
– Laboratoriočájánâsväldimeh, juávkkutäärhistmeh já silliimeh juátkojeh nuuvtko táássáš-uv.
– Čevetjäävri vyeli- já paješkoovlâ uáppeeh pyehtih kevttiđ pargotiervâsvuođâhuolâttâs palvâlusâid škovlâpeeivi ääigi äigiväridemttáá puátteevuođâst-uv, p. 040 162 8763, (puáhtá suáittiđ argâpeeivij tme 10–11).
Čevetjäävri já Njiävđám kuávlust láá ohtsis 250 ässed. Čevetjäävrist Avveel tiervâsvuođâkuávdážân lii mätki paijeel 150 kilomeetterid já Njiävđámist paijeel 180 kilomeetterid. Laboratoriopalvâlusâi lopâttem já tiervâsvuođâsajattuv ávusorroomaaigij käržidem tiet kuávlu ässei ášástâllâmmääđhih liččii kukkom uáli jo ennuv. Tot ličij lasettâm tiäđust-uv koloid, mut siämmást tot ličij puáhtám meiddei äjittiđ puácuvuođâi diagnosistem já tipšom.
Vuáđupalvâlusâi turvim lii tehálâš kuávlu eellimvuáimálâšvuođâ tááhust sehe meiddei nuorttâlâškielâ iäláskittem já nuorttâlij kulttuur siäilum tááhust. Kuávlu palvâlusâi orniimist kalga väldiđ huámmášumán meiddei tom, et kuávlust láá ennuv elilâm ulmuuh mutâ ij liijkágin máhđulâšvuotâ palvâlemasâmân. Elilâm ulmui pääihist piergim kalga torjuđ tuáimee palvâlusâiguin, moh puáhtojeh pááikán, mutâ meiddei máhđulâšvuođáin ášástâllâđ tiervâsvuođâhuolâttâs toimâsaajeest.
Käldee:
– Sosiaal- já tiervâsvuođâpalvâlusâi turvim Čevetjäävrist já sämmilij päikkikuávlu eres robdâkuávluin (samediggi.fi)
Kove: Gerd Altmann (Pixabay)