Väldikodálâš mielâtiervâsvuotâokko viättoo 17.−24.11.2024, mon ääigi uárnejuvvojeh maaŋgâlágáneh mielâtiervâsvuotân lohtâseijee tábáhtumeh pirrâ Suomâ. Taan ive mielâtiervâsvuotâoho fáddán lii ”mielâstittee puátteevuotâ”. Ulmen lii pyehtiđ oovdân tom, ete puoh ulmuin, mielâtiervâsvuotâčuolmâin huolâhánnáá, kolgâččij leđe máhđulâšvuotâ já vuoigâdvuotâ vaikuttiđ, finniđ já adeliđ viärdásâštorjuu sehe viggâđ naharijdis juksâmân. Mielâtiervâsvuotâokko lii uárnejum ohhoost 47 ain ive 1974 rääjist.
Mielâtiervâsvuotâokko álgá oho 46 pasepeeivi, kuás cokkiittuvvojeh kinttâleh jiešsorme uhrij muušton. Kintâltilálâšvuođâin kunnijâttojeh jiešsorme peht jáámmám ulmui muštoh já tuárjojeh tagareh ulmuuh, kiäh láá monâttâm aldaulmuu. Suomâst jammii 740 olmožid jiešsorme peht ive 2022. Koskâmiärálávt jiešsormeh tábáhtuveh 2−3 jyehi peeivi. Kintâltilâlâšvuođah jiešsorme uhrij muušton láá uárnejum Suomâst ive 1992 rääjist. Tábáhtume koordinist Mielâtiervâsvuođâ kuávdášlitto oovtâst viärdásâštoorjâornijdume Soropaddijn (su. Surunauha). Taan ive kintâltilálâšvuođah tuállojii paijeel 40 päikkikoddeest pirrâ Suomâ.
Mielâtiervâsvuotâoho ääigi uárnejuvvojeh jieškote-uvlágáneh páiháliih tábáhtumeh pirrâ Suomâ. Listo páihálijn tábáhtuumijn kávnoo tääbbin. Ton lasseen Mielâtiervâsvuođâ kuávdášlitto uárnee väldikodálijd Mielâtiervâsvuotâmessuid 19.−20.11. káidusohtâvuođáin. Messuin puáhtá čuávvuđ maaŋgâlágánijd mielâtiervâsvuotân lohtâseijee seminaarijd já luvâlduvâid. Taan ive luvâlduvah kieđâvušeh ovdâmerkkân ohtuuvuođâ, ucceeblohostreesi, vuoiŋâštiervâsvuođâ, silloom já seksuaalviehâvääldist tuoibâm. Uási ohjelmist lii nuuvtá, uásán luvâlduvâin vist ferttee uástiđ liipu. Mielâtiervâsvuotâmeesui oles ohjelm sehe ravvuuh kávnojeh tääbbin.
Käldeeh:
– Mielenterveysviikko (www.mtkl.fi)
– Kynttilätapahtuma (surunauha.net)
Kove: Myriams-Fotos (Pixabay)