Sämitige stivrâ lii kieđâvuššâm ive 2025 vuáháduttemtooimâid uđđâ šiäštusume vuáđuld.
Suomâ haldâttâs lii meridâm čuoppâđ Sämitige kulttuurjiešhaldâšem ruttâdem 193 000 euro verd. Porgemáánust staatâvarijministeriö iävtuttem čuoppâm lâi vala 568 000 eurod. Sämitigge lii porgâm korrâsávt čuoppâmij ucedem oovdân, já ovdil miärádâs tot teeivâi eereeb iärrás uáiviminister Petteri Orpoin, máttááttâs- já tave-eennâmlii ohtsâšpargominister Anders Adlercreutzáin, ovdâskoddejuávhui saavâjođetteijeiguin já aalmugovdâsteijeiguin.
– Mun halijdâm kijtteđ puohâid vaiguttempargoost. Mij luhostuim čielgiđ merideijeid, ete mon merhâšittee paijeel pele miljovn čuoppâm ličij Sämitiigán. Mij karttâp tiäđust-uv ain šeštiđ uáli jo ennuv, mutâ ep nuuvt ennuv ko algâaalgâst iävtuttui. Taat taha čuuvtij älkkeebin puáttee ive vuávám, Sämitige saavâjođetteijee Pirita Näkkäläjärvi iätá.
Sämitige stivrâ lii tuhhiittâm rekinistmijd vuáháduttemtooimâin ihán 2025. Šiäštuh kyeskih haldâttâhkoloid, pargoviehâhaldâttâhkoloid, ekonomiahaldâttâhkoloid, Kielâkäldei já pargotiervâsvuotâkoloid.
– Mij lep hiälpáskâm tast, ete vuáháduttemtooimâi uássin mij ep taarbâš celkkiđ luovâs Sämitige pargeid, Näkkäläjärvi iätá.
Sämitige olesbudjet lii suullân 10 miljovn eurod. Ive 2025 kulttuurjiešhaldâšem budjet lii 4,775 miljovn eurod. Ive 2024 vist tot lâi 4,968 miljovn eurod.
Staatâ budjetiävtuttâs kieđâvuššui čohčâmáánust, já budjet tuhhiittuvvoo ovdâskoddeest juovlâmáánust. Sämitige tievâsčuákkim áigu tuhhiittiđ Sämitige toimâvuávámbudjet ihán 2025 juovlâmáánu čuákkimist.
Käldee:
– Sämitige stivrâ meridij 193 000 euro vuáháduttemtooimâin (samediggi.fi)
Kove: Ville Fofonoff / Sämitigge