Tave-Pohjanmaa museo Oulust macâttij loopâid sämitävirijdis Sämimuseo Siidan majebaargâ čohčâmáánu 10. peeivi.
Tave-Pohjanmaa museo macâttij uási sämitävirijnis Siidan jo taan ive uđđâivemáánust. Talle macâttuvvojii säminurâlduv tekstiileh. Tääl vuárust lijjii uccâtävireh sehe kuátimuorah já kerriseh. Ohtsis Anarân láá vuálgám suullân 400 tiŋgâd, iätá intendent Eija Konttijärvi Tave-Pohjanmaa museost. Tave-Pohjanmaa museo já Sämimuseo Siida ovdâsteijeeh soppii tävirij maacâtmist moonnâm čoovčâ.
Stuorrâ uási Tave-Pohjanmaa museo sämitävirijn skáppojii 1900–1960-lovoin. Puárásumoseh tävireh, tego vuástávuormâ Iänáduvâst já novdâtäävgi uásih, láá 1700-lovvoost. Tave-Pohjanmaa algâalgâlii säminurâlduv nuurâi oululâš aalmugtiettee já museohoidájeijee Samuli Paulaharju (1875–1944). Nurâldâh tuušâi masa ollásávt kuohtii museorakânâs pyelimijn iivij 1929 já 1940. Kuábbáá-uv pyellim maŋa tävireh norrojii uđđâsist Säämist.
Sämitävirij macâttempeeivi Oulu taaiđâmuseost uárnejui tábáhtume, mast lijjii uáinimnáál suullân 30 tiŋgâd, moh macâttuvvojeh Siidan. Tai juávhust lijjii eereeb iärrás čuárvi- já muorâpastemeh, kijssá, nääpih já nukeh. Uáinimist lâi meid Tave-Pohjanmaa museo kovearkkâduv sämikovemateriaal.
Käldeeh:
– Pohjois-Pohjanmaan museo palautti loppuosan saamelaisesineistöstään Saamelaismuseo Siidalle (www.kaleva.fi)
– Pohjois-Pohjanmaan museo luovutti saamelaistekstiilejä Siidalle (www.kaleva.fi)
– Pohjois-Pohjanmaan museon saamelaisesineistön toinen osa siirtyy Saamelaismuseo Siidaan (pohjoispohjanmaanmuseo.fi)
Kove: Oulun museo- ja tiedekeskus