Botswanalii kuáivuttuvâst lii kavnum maailmhistorjá nubben stuárráámus ruávistiimaant. Taat esken kavnum ruávistiimaant lii 2 492 -kaaraatsâš, já tot lii kavnum kuáivuttuvâst eennâm tavenuorttiiuásist. Árvukeeđgi tubdâmist lii kevttum ävkkin röntgentekniik.
Kanadalâš kuáivuttâhfinnodâh Lucara Diamond Corp kaavnâi tiimaant mut ij muštâlâm tađe eenâb árvukeeđgi áárvust tâi kvaliteetist. Finnoduv mield koččâmuš lii kuittâg nubben stuárráámuu ruávistimantist, mii lii kuássin kavnum. Puoh stuárráámus ruávistiimaant kavnui Botswana naaburenâmist Maadâ-Afrikist ive 1905, já taat lii 3 106 kaaraat Cullinan. Taat tiimaant lii kevttum Britannia kunâgâsperruu ruvnâčiiŋâi uássin.
Botswanast kávnojeh ennuv timanteh, já enâmist láá-uv maaŋgah tiimaantkuáivuttuvah. Siämmáá kuáivuttâhsaajeest, mast taat-uv tiimaant kavnui, láá ovdil kavnum 1 758- já 1 109 -kaaraatsiih timanteh.
Botswana tiijmáš tiimaantpuovtâdem lii lamaš nyevt kulmâ miljard eurod. Tiimaantpuovtâdem lii Botswana tergâdumos ruttâkäldee.
Saijeem maŋa timantij hadde rekinistoo ivne, saijeemvyevi, kaaraat já putesvuođâ mield. Oovtâ kaaraat tiimaant koskâmiärálâš hadde lii 4 000 já 6 000 euro kooskâst.
Käldee:
– Op een na grootste diamant ooit gevonden in Botswana (nos.nl)
Kove: Jerry Cone (Wikimedia Commons)