Kiinalâš mánudâšmooduul Chang’e-6 lii siäivum Mánudáá tuáváábel tooláá pasepeeivi Suomâ ääigi. Taat Mánudáá sevŋis peeli ij kuássin oinuu Enâmân. Tiäđu mooduul siäivumist lii adelâm kiinalâš komovuotâorganisaatio CNSA. Chang’e-6 paččui máátkán vyesimáánu 3. peeivi.
Taan mánudâšmissio ulmen lii nuurrâđ kyehti kiilu mánudâškoovjâid já keeđgijd nuuvt kočodum Aitken-kraatterist Mánudáá maadânäävi alne. Aitken lii kieŋâlis kraatter, mon lyeddejeijee lii 2 500 kilomeetterid. Chang’e-6-modulân láá väridum kyehti pirrâmpeeivi materiaalij nurâmân. Jis Chang’e-6 luhostuvá maccâđ Enâmân, te taat ličij vuosmuš tohe, ko čáittuseh láá nurrum Mánudáá sevŋis peln. Taah koovjah já keeđgih láá geologisâš avvees mield suullân nelji miljard ihheed puáráseh. Čáittusij tutkâm vuáđuld kijnáliih tieđâalmaah tuáivuh, et sij finniiččii lasetiäđuid tast, maht Mánudâš lii šoddâm.
Kiina lâi ive 2019 vuosmuš eennâm, mii luhostui finniđ komovuotâmooduul Mánudáá tuáhá. Amerikliih já ryeššiliih mánudâšmissioh láá tutkâm Mánudáá ovddiipele.
Kiinast láá meid eres vuáváámeh komovuotâmađhij várás: tast lii áigumuš vuolgâttiđ aldapuátteevuođâst Mánudâžân vala kyehti ij-almaidittum missio, moh valmâštâlleh Kiina váldu-ulmásis vuolgâttiđ astronautijd Mánudâžân ive 2030 já huksiiškyettiđ tohon tutkâmsajattuv. Maŋeláá vuolgâttuvvojeh meid komovuotâluođâneh Marsân já Jupiterân, já ulmen lii čokkiđ tobbeen-uv myensterijd.
Käldeeh:
– Chinees ruimtevaartuig bereikt achterkant maan om gruis te verzamelen (nos.nl)
– Kiina laukaisi matkaan oman kuuluotaimensa (www.hs.fi)
– Kiinalaisalus laskeutui onnistuneesti Kuun pimeälle puolelle (www.hs.fi)
Kove: p2722754 (Pixabay)