Anarâškielâ seervist láá uđđâ nettisiijđoh

Anarâškielâ seervist láá uđđâ nettisiijđoh. Toh almostuvvii njuhčâmáánu 21. peeivi 2024 ihečuákkim ohtâvuođâst. Liŋkkâ lii siämmáš ko ovdil-uv.

Anarâškielâ servi meridij uđâsmittiđ nettisijđoidis, tastko Wikipedia já Anarâš aavis áánsust servi lii tääl čuuvtij eenâb uáinusist – ij tuše Suomâst pic meiddei aalmugijkoskâsii tääsist. Puáris nettisiijđoh iä innig västidâm seervi tááláid tárboid. Nubben suijân lâi tot, et seervi loostâi digivuárkká ij lah innig nuuvtá, já tondiet anarâškielâ sárnooh iä innig peessâm luuhâđ seervi almostittem loostâid ton peht. Servi tarbâšij uđđâ saje, kuus pieijâđ jieijâs loostâid já eres almostitmijd.

Siskáldâs lii čallum kuulmâ kielân: anarâškielân, suomâkielân já eŋgâlâskielân. Kielâversioi kooskâst iä lah siskáldâsiäruh. Ovdâsiijđo, liiŋkâi siijđo já ohtâvuotâtiäđui siijđo lasseen sijđostuvâst láá kulmâ váldu-uásáduv: Toimâ, Almostitmeh já Servi.

Toimâ-uásáduvâst oovdânpuáhtoo seervi toimâ ađai almostittem- já kirjetoimâ, anarâš ehideh já tutkâm.

Almostitmeh-uásádâh vuod siskeeld puoh, maid servi lii almostittám iivij mield: loostâid, kiirjijd, videoid já eres-uv almostitmijd. Jis kiinii haalijd tiiláđ seervi almostittem kiirjijd, te kirjelisto já kirjij hadeh kávnojeh taan uásáduvâst. Ton lasseen tast láá rijjâ luuhâmnáál puoh Anarâš-loostah, maid servi lii almostittám ive 2019 rääjist, já meiddei puoh Lostiih. Puátteevuođâst uđđâ Anarâš-loostah lasettuvvojeh ain seervi nettisijđoid iäge innig Issuu-sijđostâhân.

Majemuš váldu-uásádâh lii Servi. Tot siskeeld seervi njuolgâdusâid sehe tiäđuid seervi stiivrâst já tast, magareh jeessânšlaajah seervist láá já maht puáhtá servâđ seervi jesânin.

Nettisiijđoid lii huksim Tero Riskilä, já toi siskáldâs kuulmâ kielân lii čáállám Fabrizio Brecciaroli. Pauli Rämö lii testam siijđoid já lii visásmittám tom, et siijđoh tuáimih pyereest sehe tiäturáin já puhelimáin.