Moonnâm lávurduv 3.2. paijeel 150 000 olmožid čaittii mielâs robdâuálgispiäláduv AfD (saksakielân Alternative für Deutschland, Muulsâiähtu Saaksan) vuástá Berlinist. Poolis mield kuávlu staatâpeivitáálu alda, kost mielâčááitus uárnejui, lâi nuuvt tievâ ulmuin, et sij pivdii, et lase ulmuuh iä vuálgáččii innig toho. Pääihi alne lijjii suullân 700 poolisalmajid já -nisonid. Mielâčäitteeh rahtii olmoošviđjá staatâpeivitáálu pirrâ. Mielâčáittus uárnejeijee lâi litto Hand in Hand (kietâ kieđâst). Lito áárvu mield mielâčáittusân uásálistii joba 300 000 olmožid.
Meiddei eres kaavpugijn Saksaast uárnejuvvojii mielâčáittuseh AfD-piäláduv vuástá moonnâm oholoopâ ääigi. Ovdâmerkkân sehe Augsburgist já Nürnbergist 25 000 olmožid čaittii mielâ já Freiburgist 30 000 olmožid. Saksa littokansler Olaf Scholz mield taah mielâčáittuseh láá ”kievrâs merkkâ” demokratian já vuáđulaahân.
− Sehe uccâ já stuorrâ kaavpugijn ubâ enâmist ulmuuh čokkâneh čäittiđ mielâ vájáldittem, vaje já vááinu vuástá – meiddei taan oholoopâ, Scholz čaalij X-palvâlusâst.
Scholz jieš uásálistij mielâčáittusân Potsdamist uđđâivemáánust.
Mielâčáittuseh láá jotkum Saksaast jo kulmâ oho. Toh algii tast, ko saksalâš totkee journalism nettisijđo Correctiv muštâlij tast, ete AfD-piäláduv jesâneh lijjii savâstâllâm robdâlihâstâsâi čuákkimist eres lasseen miljovnij enâmânvärrejeijei vyejeetmist Saksaast. Tot koskâččij meiddei saksaláid aalmugjesânáid, kiäin lii enâmânvarrimtuávááš. AfD lii nonnim, et ton jesâneh láá uásálistám čuákkimân.
Käldeeh:
– Berliinissä 150 000 ihmistä osoitti mieltään äärioikeistoa vastaan (yle.fi)
– Mehr als 200.000 Menschen gegen Rechtsextremismus (www.tagesschau.de)
– AfD-Politiker diskutieren offenbar Vertreibungsplan (www.tagesschau.de)
– Menschenkette um das Reichstagsgebäude: Mehr als 150.000 Teilnehmende bei Demo gegen rechts (www.tagesschau.de)
Kove: Jörg (Pixabay)