Presidentvaaljâi vuosmuu jienâstempaje vyeitten pajanij vyerdittetteht kokoomus iävtukkâs Alexander Stubb. Sun finnij 27,2 prosentid jienâin. Nube jienâstempajan uulâi meid väljejeijeeseervi iävtukkâs, ruánáá piäluduv Pekka Haavisto. Sun vuoitij kuálmádin pááccám vuáđusyemmilii Jussi Halla-aho 6,8 prooseentohtâduvváin.
Alexander Stubb lâi puoh pivnohumos iävtukkâs puohnissii 84 kieldâst, Pekka Haavisto 39 kieldâst já Jussi Halla-aho 78 kieldâst. Kištoost niäljádin pááccám Olli Rehn lâi pivnohumos 108 kieldâst.
Kuálmádin šoddâm Jussi Halla-aho lâi pivnohumos Laapi já Satakunta vaaljâkuávluin já niäljádin šoddâm Olli Rehn Oulu vaaljâkuávlust. Eres vaaljâkuávluin vuosmužžân šoodâi jo-uv Stubb teikâ Haavisto.
Stubb finnij jienâid eromâšávt ruotâkielâlii riddokuávlust. Korsnäsist sun finnij joba 60,2 prosentid jienâin. Haavisto pelestis finnij alemuid kyedittemlovoidis Ahvenanmaast. Sun lâi meid vuosmuš stuorrâ kaavpugijn: Helsigist, Tuurkust, Tamperest já Oulust.
Syemmiliih jienâstii uáli aktiivlávt: 74,9 prosentid jienâstemvuoigâdvuođâlijn ulmuin jienâstii vuosmuu jienâstempaje ääigi jo-uv muuneeld teikâ eidusii vaaljâpeeivi ääigi.
Käldee:
– Näin Suomi äänesti – tämä juttu paljastaa yksityiskohdat (yle.fi)
Kove: Matti Porre / Tasavallan presidentin kanslia