Uđđâivemáánu 15. peeivi 2024 sämmilij aalmuglâšteatter Beaivváš ornij ”Váimmus váibmui” ‑juhlekonsert Sajosist Anarist. Konsert kulá stuárráb turneen, mii jotá pirrâ Taažâ, Suomâ já Ruotâ. Stivrejeijen tuáimá Rolf Degerlund.
Beaivváš-teatter lii pyevtittâm jieškote-uvlágánijd konsertijd já čaitâlmijd paijeel 40 ive ääigi. Teatter vuáđudui ive 1981. Ton neljilovivváášpeeivi kunnen uárnejui ”Aaigij čoođâ” ‑konsert ive 2021. Ive 2024 teatter finnee uđđâ viäsu, mii liäkká uuvsâid Kuovdâkiäinust Taažâst porgemáánust.
”Váimmus váibmui” ‑juhlekonsertáin Beaivvâš-teatter haalijd pajediđ já lekkâđ jieijâs muusiklii aarničuhe puohháid. Turnee ulmen lii čäittiđ, mon fiijnâ pargo čaittâleijeeh já musikkáreh láá porgâm uássin sämmilij kulttuurhistorjást.
Konsert piištij váhá paijeel tijme, já keččeeh lijkkojii toos čuuvtij. Puoh musikkáreh lijjii hirmâd čeepih, já tuođâi meid liegâsvuotâ tubdui vááimust. Pitái fáádáh muttojii, já tobdoh muttojii toi mield.
Veijo Länsman ”Ráhkistan dajan dutnje” lâi herkis laavlâ. ”Gáktenieida” pittá vuod ilosmitij keččeid já puovtij moje muáđoid.
Marte Fjellheim Sarre čuovâi tego täsni. Puoh čaittâleijeeh šelguu sehe oovdâst já ohtuu.
Eromâš kijttoseh kuleh čepis pianistân Andreas Gundersenân, kote čuojâttij hirmâd muččâdávt, sehe Iŋgor Ántte Gaupân, kote juoigâi konjâleh čoolmijn já lâi ubâ čaaitâlm siälu.
Muusik, juoiguuh já lavluuh jođettii keččeid fáárun čuovâkuvijguin já fallii meid eromâš audiovisuaallii fiäráán.
Heli Huovinen, mediapargee já pyevtitteijee, muštâl jieijâs teatterfiäránist:
– Muu mielâst konsert ubâlâšvuotâ lâi mielâttes pyeri. Tobdoh muttojii lavlui mield. Motomin povvâstim já motomin čiäruškuottim. Aalgâst lâi suotâs tot suátilaavlâ. Tast lâi meid mottoom ”suátimarssi” suomâkielân-uv fáárust. Puoh pyeremustáá paasij mielân kuittâg Mary Sarre laavlâ páárnán. Tot lâi uáli jo kuoskâtteijee. Konsert ličij lamaš pyeri meid škovlâláid já párnáid. Eromâšávt historjá tááhust lii stuorrâ šaali, ete škovlâliih já párnááh iä uáinám tom. Tuáivu mield tot luhostuvá puátteevuođâst!
Kove: Vesa Toppari / Sämitigge