Aanaar SM- já Suomâ Cup ‑čuoigâmkištoh nuhhii pasepeeivi almai 50 km ärbivuáválii čuoigâm koskâäigivuolgâkiišton. Juvduuvääri vieltijn puoh jotelumosávt moolân peesâi IF Minken ovdâsteijee Alexander Ståhlberg. Saaveehlättein, maid piäiváš lâi lieggim njuoskâsin, vuáittuäigin šoodâi 2.17.24,0.
Anarâš aavis sahhiittâlâi vyeittee, kote lâi uáli tuđâvâš suomâmiäštárvuotân. Kišto sun valdâlij korâsin.
– Aalgâst mun irâttim maaššâđ jeđe loopâst puáttiđ liävttoin. Lijjim hirmâd vaibâm majemuu uásist. Lii kale uáli jo korrâ mecci, puoh korrâsumos kost mun lam čuoigâm. Tot kuittâg suápá munjin, Ståhlberg eeđâi.
24-ihásâš vöyrilâš vuolgâttij 150-ihásii Aanaar kieldân ustevlijd tiervuođâid.
– Mun tuáivuttâm luho. Hirmâd pyereh kištoh, hirmâd fiijnâ saje já enâduvah, Ståhlberg rammui.
Miro Karppasâžân silbâ, Lauri Mannilan pronssi
Imatran Urheilijat ‑seervi ovdâsteijee Miro Karppanen vuoitij SM‑siilbâ. Sun paasij Ståhlbergist 46,4 sekuntáin. Anarâš aavis koijâdij meid silbâalmaa smiettâmušâid.
– Lam luholâš, ete peessim moolân. Mätki lâi lussâd, mutâ vajam pyereest, Karppanen muštâlij.
Meid Karppanen rammui Aanaar kištoid.
– Šiev šoŋŋâ, saaveehlätteeh pyere oornigist já nuuvt korrâseh ko pyehtih leđe. Tubdâmušah já kištostadion láá meid pyereh. Ij liččii puáhtám leđe pyereeb saje lopâttiđ paje, Karppanen eeđâi.
Henna Tervaniemi sahhiittâlâi.
Proonsi háputtâláin Lauri Mannila (Taivalkosken Metsä-Veikot 85) já Emil Liekari (Vuokatti Ski Team Kainuu). Mannila lâi čiččâm sekuntid jotelub. Suu iäru njunošân lâi 1.20,2.
Aanaarláid 50 km kišto lâi jiäráskittee, tastko Inarin Yritys ‑seervi Anton Kemppi lâi njunošist ain kišto pelimudo räi. Loopâst Kemppi liähtu kuittâg čaaskâi já sun paasij kuđâdin, kyehti já peli miinut Ståhlbergist.
Vuorela Suomâ Cup miäštár
Karrieeris majemuid kištoid čuoigâm Markus Vuorela (Jämin Jänne) vuoitij Suomâ Cup miäštárvuođâ 344 čuággáin. Suu vuáittu visásmittui jo talle ko poođij tiätu, ete nubben leijee Iivo Niskanen (Puijon Hiihtoseura) ij ááigu uásálistiđ 50 km máátkán. Niskanen pisoi kuittâg Suomâ Cup palhâšumesoojijn, tastko suu 232 čyegisid pijssájii ain kuuđâd sajan. Alexander Ståhlberg pajanij nubben (306 čyegisid). Ville Ahonen lâi kuálmád (261 čyegisid, Imatran Urheilijat), Emil Liekari niäljád (254 čyegisid) já Ristomatti Hakola viiđâd (236 čyegisid, Jämin Jänne).
Imatran Urheilijat vuoitij Haku-Veikko pookaal. Tot mieđettuvvoo siärván, mon kuulmâ pyeremuu čyeigee ohtsâšpuáđus lii puoh pyeremus 50 km kištoost.
Käldee:
– Hurja näytös Inarissa! Alexander Ståhlberg SM-viidenkympin kuningas! (etusuora.com)
Artikkâlkove: Valtteri Valkeapolku