Onne pasepeeivi Aanaar SM‑kištoin nisoneh kištottellii 30 km ärbivuáválii čuoigâm koskâäigivuolgâkištoost. Ounasvaaran Hiihtoseura ovdâsteijee Johanna Matintalo lâi jo vuosmuu koskâäigisaje puotâ váldám olssis njunošsaje já siäiluttij tom ubâ kišto ääigi. Moolân kollečyeigee poođij aigijn 1.23.51,9 oovtâst Ikaalisten Urheilijat ‑seervi Krista Pärmäkoskijn, kiäs Aanaar kištoh lijjii karrieer majemuuh. Pärmäkoski poođij kištoost lovádin.
Pohti SkiTeam Pyhäjärvi ovdâsteijee Oona Kettunen vuoitij siilbâ. Sun paasij Matintalo liävtust 1.34,7 minuttáin. Proonsin čuoigâi Emmi Lämsä (AT Ski Team) ucánjáhháá vuálá 12 sekuntid hitásubbooht ko Kettunen.
Matintalo: Ulmen lâi čuoigâđ Krista kiddâ, ij vyeittiđ Suomâ miäštárvuođâ
Johanna Matintalo lâi lamaš pyeccen ige vistig áigum uásálistiđgin 30 km kiišton. Lávurduv ääigi sun kuittâg meridij vyelgiđ fáárun. Miärádâsân vaiguttij eromâšávt tot, ete koččâmušâst lijjii Krista Pärmäkoski já Katri Lylynperä majemuuh kištoh. Matintalo muštástâlâi Taivalkoski ive 2018, kuás Aino-Kaisa Saarinen lopâttij karrieeris čuoigâmáin moolân kietâ kieđâst Pärmäkoskijn já Kerttu Niskasáin.
– Jieht šoodâi naver, ete jis Kristast čuoigâm ij jođe já must jotá, te váldáččim suu kiddâ já pesâččáim kietâ kieđâst moolân. Tot lâi muu ulme onne ige Suomâ miäštárvuotâ jiešalnees. Lam aaibâs mielâttes luholâš já ilolâš, ete tot luhostui, Matintalo muštâlij media sahhiittâlmist. Matintalo vuolgij kištoost joton vittâ miinut Pärmäkoski maŋa.
Anarâš aavis koijâdij uđđâ Suomâ-miäštárist smiettâmušâid Anarist.
– Mun lam tääbbin tääl nube tove kištottâlmin, já Aanaar lii vissásávt ohtâ muu jiellâhkištosoojijn Suomâst. Maaŋgâs láá hirmástum já ton uáivilist, ete saaveehlätteeh láá liijkás lussâdeh, mutâ mun lam ton mielâst, ete mij kolgâččijm tuálvuđ Suomâ kištoid eenâb taan kulij. Motomin mij čuoigâp täid masaba jo ”piälduin”, Matintalo pahudij.
Anarist 30 km kištoost čyeigeeh čyeigih kulmii 10 km mohe Juvduuvääri vieltijn. Juvduuvääri lii tobdos vättee kuávlun. Maaŋgah kištottelleeh smiettii jo ovdil pasepeeivi, ete mahtsun sijjân kiävá. Loopâloopâst 66 čyeigest tuše kuuđâs koskâldittii.
Hilla Niemeläst virgálávt Suomâ Cup miäštár
Hilla Niemelä, kote lâi onne 11:d, vuoitij meccičuoigâm Suomâ Cup 542 čuággáin. Sun lâi visásmittám vuáitu jo vástuppeeivi 5 km kištoost, mast sun poođij vuosmužžân já finnij 100 čyegisid.
Suomâ Cup eres palhâšumesoojijd pottii Amanda Saari (Tampereen Pyrintö, 358 čyegisid), Nora Kytäjä (Iisalmen Visa, 341), Jasmin Kähärä (Vuokatti Ski Team Kainuu, 335), Johanna Matintalo (Ounasvaaran Hiihtoseura, 310) já Emmi Lämsä (AT Ski Team, 306).
Niemelän Aanaar kištoh lijjii eromâš pyereh. Persovnlii Suomâ Cup miäštárvuođâ já 5 km kole lasseen suu servi Ikaalisten Urheilijat vuoitij joba kulmâ palhâšume: SM‑viestâsiilbâ, Suomâ Cup viestâkištoi niäljád saje sehe Marja-Liisa pookaal. Taam pookaal vuáittá tot servi, mon kuulmâ pyeremuu čyeigee ohtsâšpuáđus lii puoh pyeremus 30 km kištoost.
Käldee:
– Johanna Matintalo murskavoittoon SM-hiihtojen 30 km kisassa – Oona Kettuselle unelmahiihdolla hopeaa (etusuora.com)
Artikkâlkove: Valtteri Valkeapolku