President Martti Ahtisaari lii hävdidum vástuppeeivi skammâmáánu 10. peeivi. Staatâlijn hävdidmijn oinui Ahtisaari maaŋgâi luvij ivij kukkosâš aalmugijkoskâsâš pargo. Hävdidmáid uásálistii maaŋgah aalmugijkoskâsiih árvukyesih.
Ruotâ kunâgâs Kaarle XVI Kustaa kunnijâtij president Ahtisaari mušto mieldioromijnis. Hävdidmáid uásálistii meid eereeb iärrás Kosovo president Vjosa Osmani, Namibia president Hage Geingob já Tansania oovdiš president Jakaya Kikwete. Sii lasseen The Elders -juávhu saavâjođetteijee, Irland oovdiš president Mary Robinson uásálistij hävdidmáid.
Hävdidmáid uásálistii nyevt 30 aalmugijkoskâsâžžâd kyessid. Pääihi oolâ vuárdojii ohtsis suullân 800 kyessid.
Staatâláid hävdidmáid lijjii puávdejum kyesih sehe staatâlii protokol já omâhái tuoivui mield. Suomâ alemus staatâstivrim kunnijâtij president Ahtisaari mušto mieldioromijnis.
President, ráávhunobelist Martti Ahtisaari jaamij 16.10.2023. Ahtisaari eelij 86-ihásâžžân. Sun lâi šoddâm Viiburist 23. kesimáánu 1937.
Martti Ahtisaari lâi Suomâ täsivääldi lovváád president ivij 1994–2000.
Täsivääldi president Sauli Niinistö toolâi muštosaavâ hävdidemtilálâšvuođâst. Anarâš aavis lii jurgâlâm Niinistö muštosaavâ sämikielân.
Niinistö muštosaahâ sämikielân
Stuorrâ eellimpargo lii tievvâm. Martti Oiva Kalevi Ahtisaari, mii täsivääldi lovváád president, lii sirdâšum ääigi rääji nube pel.
Martti Ahtisaari eelij kuhes já vaigutteijee eellim. Sun lâi stuorrâ syemmilâš, palhâšum Nobel-ráávhupalhâšuumijn. Sun kuođij kieđâidis luodâid sehe aalmuglii já aalmugijkoskâsii historján.
Kuávdáást puoh tooimâin sust lâi olmooš. Sun ooinij juáhháá aldemussân, já enâmustáá paattum ulmust-uv sun ooinij maidnii puorijd, kuus kulij viggâđ. Mon oolâ huksiđ ohtâvuođâ já ráávhu. Vaibâhánnáá toimâđ pyereeb ittáá pyerrin.
Martti Ahtisaari lâi hirmâd uccáá politikkár já hirmâd čuuvtij diplomaat. Presidentvaaljâin 1994 sun poođij siisâ tuárispeln – politiik ulguupiälásâš olmooš väljejui politiik válduläävdi oolâ.
Sun ij viggâm heiviittiđ jieijâs pooliitlii täpikulttuurân, mast meid šoodâi árvuštâllâm. Mut pooliitlâš täpikulttuur heivitškuođij-uv jieijâs mudágubbooht suu kulij. Tego lii pyereest kovvejum, sun lâi ”vyeligis hierarkiai olmooš”.
Puátusáid viggee hovdiimist, siämmáánáál ko luhostum diplomatiast, ij pyevti čiähádâttâđ ciälkkámušâi, lahâcehij teikâ protokol tuáhá. Tom kalga porgâđ persovnáin. Já návt Ahtisaari tuođâi poorgâi.
Suin oovtâst porgâm ulmuuh láá kuvvim suu rávhálâžžân, kierdâvâžžân já lieggâ olmožin. Almajin, kote maašâi orostiđ já kuldâliđ. Mut táárbu mield sun kovvejui meid čovgâdin já meritiäđulâžžân ráđádâllen.
Maaŋgâs láá vaarâ puáhtám jyehiđ mušto tast, mon čeepiht Martti maatij ložžiđ kelduid teikâ ärgivuođâ sist, kiäh pottii suin teivâđ. Távjá toos pijsái lieggâ lehâstem: ”Tiervâ, miisun tääl tiäddá tuu mielâ?”
Jieijâs sanij mield sun lâi avalâš evakko. Taat pärnivuođâ korrâ mušto aargâ háváduvveevuođâst išedij suu maŋeláá pieijâđ jieijâs konfliktkuávlui eđevuálásij ulmui sajan. Ličij älkkee jurdâččiđ, et pärnivuođâst tábáhtum ruottâsijn meddâlkiškettem vyejettij suu maailmân. Taam sun ij vaarâ liččii jieš čáállám vuálá. Nuorâ mielâ tiätuäŋgirvuotâ já nuvâhánnáá aktiivlâšvuotâ lijjii toh, moh tolvuu suu maailmân, mut ruottâseh lijjii já pissuu kieŋâlist Suomâ enâmist.
Martti tuubdâi enâmis. Pääihi saje lâi muttuustâllâm, já ton peht sun oopâi tubdâđ maaŋgâmuđusii syemmilâšvuođâ. Puoh tast paccii pyereh muštoh já áárvustanneem. Taam puohtii meid aalmugässeeh vyettiđ maaŋgâin eennâmkoddemaađhijn. Já tohhân lijjii. ”Tiäđust-uv mun puáđám”, lâi távjá kullum vástádâs povdiimáid eennâm sierâ kuávloid.
President toimâpaje 1994 aalgij korrâ ekonomia ääigi. Vistig president vaaldij uáinojeijee roolâ savâstâlmijn já tooimâin ton pyerrin, et ekonomisâš kriisâ kuođđuuččij já ekonomia jorgettičij pyereeb kuávlun. Eejieennâm äšši, olgoldâs ohtâvuođâin já ekonomisávt pyereestpiergejeijee Suomâ, lâi ulmen.
Viirgánlavkkimsavâstis sun vuordij vuoigâdvuođâ tobdo puáttein miärádâsâin: ”Olmoošárvu kalga pieijuđ uđđâ ohtsâšibárdâs politiik kevttimvyeimin. Kalga anneeđ huolâ tast, et mii aldemuuh, kiäh láá hiäjumuu uásist, iä moonât oskoos ittáá piäiván.”
Martti Ahtisaari onnui áárvust maailmist. Enâmustáá uáinojeijee tubdâstus lâi Nobel-palhâšume, mii mieđettui sunjin merhâšittee áánsust ráávhu pargoost. Sun lii meid pááccám pisovávt muušton, nuuvt maaŋgâid tiervuođâid já muštemijd mij lep maailmist kuullâm.
Áárvustanneem oinui meid veikâba EU Firenze njunoščuákkim eehidmálásij ääigi 1996, maid mun novisin peessim čuávvuđ. Staatâhoovdah sarnuu rijjâ tast, mii peiviv ij val lam lekkum, siämmást ko sij navdâšii purrâmušâst. Poođij puddâ, et kahvâleh orostii. Martti Ahtisaarist lâi sahâvuáru, pevdi josijdui. Puohah halijdii tárkká kuldâliđ, maid sun ceelhij.
Ráávhu lâi sunjin tavosääni: táttum äšši. Tot merhâšij jieijâs navcâi omâstem paargon, mut meiddei háástu toid, kiäin lâi väldi vaiguttiđ. Viestâ sijjân kullui: ”Ain láá hiäđuh, maid suáti oovded. Tondiet toh, kiäin lii väldi já vaiguttemväldi, pyehtih meid orostittiđ taid.”
Eeppidhánnáá sun ráávhu rähtimist rávhálijn stijlâinis ložžij vistig kelduid, kuldâlij eenâb ko sáárnui, stivrij uásipeelijd tuáru váimusân – já toin naalijn kuuloold luovâsmitij sii viärjuin.
Taat lii osko toos, et mon olmooš lii cuovkkim, te tom olmooš meid tivo. Ráávhu rähten lâi tehelâš, et puohah, kiäid suáti kuáská, finnejii jienâs kulosân. Nisonij já nieidâi saje turvim lâi eromâš tehelâš.
President Ahtisaari pargo Indonesiast, Kosovost, Namibiast já eres-uv soojijn lii kuáđđám luodâid maaŋgâi ulmui elimân. Maaŋgah suu maailmist teivâm ulmuuh láá puáttám meid onne teehin kuhes mađhij tyehin kunnijâttiđ suu mušto. Tot lii meid inspiristám, já ain inspirist, maaŋgâid syemmilijd diplomaatsuhâpuolvâid. Suu ovdâmerkkâ čaaitij, maht korrâ pargo já noonâ uáinu kyeddih heeđâlm. Et diplomatia kiedist uccâ-uv enâmâš puáhtá finniđ ááigán stuorrâ tavoid.
Enâmustáá, já eromâšávt, Martti lâi pelikyeimi já eeči. Taatkin ij lamaš sunjin oovtâ kulij jottee kiäinu. Eeva já Marko, tuoi leppee jottáám kuhes määđhi Maarti paaldâst. Sun puovtij maaŋgâ ohtâvuođâst oovdân tunnuu torjuu mittedmettumis merhâšume. Tunnuu huolâ anneem suu puáccám maŋa lii lamaš kuoskâttettee.
Eeva rooli lâi čuuvtij eenâb ko pargo diplomaat pelikyeimin. Tuoi Marttijn leppee oovtâst porgâm stuorrâ ohtsii pargo. Jieččân staatâkolliistâlmist Namibiast moonnâm kiiđâ kiärdášui távjá mušto Eevast já Maartist, já tast, maid tuoi oovtâst leppee finnim ááigán.
Ubâ Suomâ sehe Martti Ahtisaari usteveh já pargoskipáreh pirrâ maailm mušteh onne president Ahtisaari, tobdeh kieŋâlis kunnijâttem já kijttevâšvuođâ suu eellimpaargon já väldih uási suu aldemui soron.
Käldeeh:
– Presidentti Martti Ahtisaari 1937-2023 (valtioneuvosto.fi)
– Presidentti Ahtisaaren valtiollisiin hautajaisiin on osallistumassa useita kansainvälisiä kutsuvieraita (valtioneuvosto.fi)
– ”Suuri elämäntyö on täyttynyt” – lue presidentti Niinistön muistopuhe sanasta sanaan (www.is.fi)
Kove: Lauri Heikkinen (staatârääđi kanslia)