Jyelgipáálu nisonij MM-kištoh uárnejuvvojeh Australiast já Aotearoast ađai Uđđâ-Seelandist 20.7.–20.8.2023.
Kištoin láá fáárust juávhuh 32 enâmist. Tave-enâmijn láá fáárust Ruotâ, Taažâ já Tanska. Suomâ juávkku lâi fáárust rätkimpaajeest, mutâ tot poođij kuálmádin jieijâs uásáduvâst Ruotâ já Irland maŋa. Tienuuvt Suomâ ij peessâm MM-kištoid.
Taat lii oovcád tohe, ko jyelgipáálu nisonij MM-kištoh uárnejuvvojeh. MM-kištoh uárnejuvvojeh jyehi niäljád ive. Ive 2019 vuoitij Ovtâstum staatâi juávkku, mii lii vuáittám kištoid ohtsis neljii. Tot lii kievrâmus vyeitteeiävtukkâs meiddei taan ive, mutâ kištoin láá fáárust eres-uv šiev juávhuh. Ovdâmerkkân Ruotâ, Saksa, Ranska já Eŋland láá piergim pyereest EM-kištoin, já lii vyerdimist, ete toh pyehtih hästiđ Ovtâstum staatâi juávhu.
Tuorâstuv syeinimáánu 20. peeivi spiällojii kištoi vuossâmuuh speelah. Vuossâmužžân spellii uárnejeijee-enâmeh: Uđđâ-Seeland vuástá Taažâ já Australia vuástá Irland. Uđđâ-Seeland olâttij, ko tot vuoitij Taažâ. Taat lâi vuossâmuš tohe, ko Uđđâ-Seeland lii vuáittám speelâ MM-kištoin, veikkâ tot lii-uv lamaš fáárust kištoin kuttii. Ovdil tot lâi táppám 12 spellâd já spellâm täsispeelâ kulmii. Nubbe uárnejeijee-eennâm, Australia, vuoitij meiddei vuossâmuu speelâs Irland vuástá.
Veikkâ Suomâ juávkku ij lah fáárust, te kištoin lii liijká syemmilâš ovdâstem. Kištoin láá 33 tuámárid, já syemmilâš Lina Lehtovaara lii ohtâ sist. Sun peesâi paargon jo nube kištopeeivi, kuás sun lâi tuámárin Nigeria–Kanada-speelâst. Speelâst lijjii korrâ tileh, já Lehtovaara kaartâi adeliđ speelâ ääigi kyehti fiskis koortâ já oovtâ ruopsis koortâ. Speelâ loppâpuáđus lâi 0–0.
Kištoi fiinaal spiälloo Sydneyst Australiast porgemáánu 20. peeivi. Kištoid puáhtá čuávvuđ Ylest teikkâ Yle Areenast.
Käldeeh:
– FIFA Women’s World Cup Australia & New Zealand 2023™ (www.fifa.com)
– Jalkapallon naisten MM-kisat järjestetään Australiassa ja Uudessa-Seelannissa vuonna 2023 (www.hs.fi)
– Jalkapallon MM-kisoissa heti yllätys – tragedian kokeneen Uuden-Seelannin tunteikas voitto veti asiantuntijat sanattomiksi ja kyyneliin (yle.fi)
Kove: Roland Schäfer (Pixabay)