Filosofia maister Taina Pieski lii väljejum Säämi museo Siida museohovdân. Säämi museosiättus haldâttâh toovâi valjimmiärádâs 15.5. čuákkimstis.
Säämi museosiättus haldâttuv saavâjođetteijee Liisa Holmberg lii ilolâš tast, et museo uážžu noonâ, hárjánâm hoovdâ, kiäst lii šiev ohtsâšpargoviärmádâh.
Uđâsmittum já vijđedum Siida lii väldikodálâš vaastâmuseo, já tot tuáimá kulttuurpirâspargoi uásild kuávlu vaastâmuseon sämmilij päikkikuávlust. Säämi museost pargeh museohoovdâ lasseen 16 fastâ parged já hoppuumui aaigij nyevt 30 parged. Siidast eelih jyehi ive suullân 100 000 kyessid. Säämi museost lii ton lasseen Iänoduvâst Tuodâr-Laapi luándukuávdáást ohtsâš čájáttâs Johtti Sápmelaččat -servijn. Säämi museo paijeentuálá meid Nuorttâlij ärbitáálu Čevetjäävrist.
”Mun lam valjiimist hirmâd ilolâš. Uđâsmittum Siida lii aalmuglii čiävluttâllâm árvusâš äšši. Lii kunneeäšši peessâđ hovdiđ já ovdediđ oovtâ mijjân sämmiláid tehelumos organisaatio tooimâ oovtâst áámmátáiđusij pargeigijn. Anam tehelâžžân sämmilii kulttuuräärbi siäiluttem, mut museo huksee meid puátteevuođâ äärbi”, iätá Taina Pieski museo tiäđáttâsâst.
Käldee:
– Taina Pieski Saamelaismuseo Siidan museonjohtajaksi (siida.fi)
Kove: Minna Saastamoinen/Studio Borga