Suomâ museolitto tiävdá taan ive 100 ihheed. Juhleive kunnen Postâ almostit postâmeerhâid, main oovdânpuáhtojeh 10 sierâ museod Suomâst sehe toi kálvu já museopiergâseh. Sämimuseo Siida lii ohtâ tain museoin, moh láá väljejum postâmerháid. Siida postâmeerhâst láá silbâsoljo, pollo já lájukappeer. Meerhâid puáhtá keččâđ Suomen Postcrossingyhdistys ry siijđoin.
Suomâ eres museoin jieijâs postâmeerhâ finnejeh meid Čuoigâmmuseo, Muusikmuseo Fame, Auto já kiäinu museo Mobilia, Museo Leikki, Museokuávdáš Vapriikki, Poolismuseo, Tuurku museokuávdáš, Suomâ lasâmuseo já Aalmuglâšmuseo. Postâmerhâi graafisii vuáváámist lii västidâm Anssi Kähärä.
Uđđâ postâmeerhah vuobduuškyetih čohčâmáánust 2023, já talle taid finniiškuát meid Siida käävpist Anarist.
Suomâ museolitto oovdâst, škuávlee já oovded syemmilii museokiedi já iššeed museoi pyereestpiergiimist. Museolitto vuájá museoi aašijd já oovdânpuáhtá Suomâ museoid. Litto lii peeggâlm eromâšávt Museokorttâ-palvâlusâst, mast láá paijeel 250 000 kevtted.
Suomen Postcrossingyhdistys ry mield čoovčâ uđđâ postâmerhâi fáddán láá museoi lasseen meid 100 ihheed tevdee Finnair já palhâšum taaiđâčuovâkoveh.
Käldee:
– Syksyn 2023 postimerkkien aiheina Finnair, Museoliitto ja palkitut taidevalokuvat (www.postcrossingyhdistys.fi)
Kove: Fabrizio Brecciaroli