Digi- já ässeetiätuvirgáduv faallâm tiäđui mield Suomâ persovntubdâldâhsysteem uđâsmittoo. Vuosmuuh uđđâ persovntubdâlduvah mieđettuvvojeh suullân ive keččin. ”Systeem uđâsmitmân lii tárbu, tastko tááláá persovntubdâldâhmyenster miäldásiih tubdâlduvah äštih forgâpalij nuuhâđ tiätupeeivijn”, Digi- já ässeetiätuvirgáduv alemus hovdâ Timo Salovaara muštâl tiäđáttâsâst. Salovaara mield arvâlus vuáđuduvá koskâmiärálii persovntubdâlduvâi adelemmiärán ivij 2016–2021.
Arvâlusâi mield táálááh persovntubdâlduvah pijsájeh val ive 2024 vyesimáánu räi. Ton maŋa uđđâ persovntubdâlduvâin kiävttojeh uđđâ koskâmeerhah. Virgádâh mieđeet persovntubdâlduvâid tááláá vyevi mield nuuvt kuhháá ko toh peri pijsájeh. Salovaara čielgee tiäđáttâsâst, et jis kuittâg persovntubdâlduvâi tárbu lassaan ovdâmerkkân paargon kyeskee enâmânvarrim keežild, te uđđâ koskâmeerhah váldojeh talle anon tolebiššáá. Taan ive aalgâst vuáimán puáttám asâttâs taha máhđulâžžân uđđâ koskâmerhâi kevttim já toin naalijn visásmit persovntubdâlduvâi rijttám meid puátteevuođâst.
Uđâsmittem maŋa ive 2000 teikâ ton maŋa šoddâm ulmuin lii persovntubdâlduvâstis tááláá A-puustav saajeest B, C, D, E teikâ F. 1900-lovvoost šoddâm ulmuin uđđâ koskâmeerhah láá Y, X, W, V já U. 1800-lovvoost šoddâm ulmuid ij innig miäruštâlluu uđđâ koskâmerkkâ. Nuuvtpa puátteevuođâst persovntubdâlduvâi áinoo iäruttâs puáhtá leđe tuše koskâmerkkâ.
Timo Salovaara tiädut, et puoh organisaatioh, moh kevttih persovntubdâlduvâid, kalgeh rahttâttâđ nubásmitmân puorijn aigijn. Návt visásmittoo, et ulmui tiäđui kieđâvuššâm tábáhtuvá njyebžilávt meid puátteevuođâst.
Käldee:
– Uudet välimerkit takaavat henkilötunnusten riittävyyden tulevaisuudessa – ensimmäiset uudenlaiset henkilötunnukset myönnetään arviolta vuoden päästä (dvv.fi)
Kove: deFerrer (Pixabay)