Kuovâmáánust 1886 syemmilâš vuolgâttâssärnideijee Martti Rautanen lâi tutkâmmääđhist Tave-Namibiast. Suu fáárust lâi sveiccilâš šaddotiettee Hans Schinz. Almaakyevtis kuáhtáin Ondonga kunâgâskoddeest leijee rituaallii väldikeeđgi. Suoi valdijn ondongoaalmug pase keeđgist muáddi pittáá, tastko suoi halijdáin selvâttiđ, lii-uv tot meteoriit.
Ondonga väldikodde laavâ mield väldikiäđgán kuoskâm lâi kieldum, já tondiet Rautanen já Schinz karttáin mäksiđ stuorrâ sááhu. Ton lasseen Schinz vyejettui enâmist. Keeđgi pittááh paccii kuittâg Rautasii pááikán Oulukondan. Tobbeen Rautasii peht toh adeluvvojii vistig Suomâ Vuolgâttâssiärván já talle Suomâ aalmuglâšmuseon.
Cuáŋuimáánu loopâst aalmuglâšmuseo pajehovdâ Elina Anttila vuáláčaalij Windhoekist keeđgij luovâtmân kyeskee virgálijd äššikiirjijd. Ráđádâlmeh keđgipittái maaccâtmist algii jo ive 2019. Pittááh luovâttuvvojii Namibia kulttuurministerân president Sauli Niinistö virgálii Namibia-määđhi ääigi. Luovâttemtilálâšvuođâst lâi fáárust meiddei Ondonga kunâgâskode tááláš haldâšeijee Fillemon Shuumba Nangalo.
Käldee:
– Suomi luovutti lähetyssaarnaajan ottamat pyhän kiven sirpaleet takaisin Namibialle (yle.fi)
Kove: Franziska (Pixabay)