Pessijái ääigi Aanaarjäävri jieŋâ alne lâi oppeet puásuikištopaje stuárráámus tábáhtume – ađai lijjii kunâgâskištoh. Táválávt kištoin 24 pyeremussâd Puásui cup -ergid peesih kištottâllâđ kyevti peeivi ääigi kunâgâs tittelist. Kunâgâsjuávhu lasseen motomij iivij láá kištoost lamaš meid nuorâi juávhuh já nuuvt kočodum Silver race -juávkku.
Mun lijjim váhá ereslágán roolâst ko táválávt, tastko jiem innig jieš vuáijámgin pic lijjim ohtâ tuámárijn. Ko lii lamaš vyeijen kuhháá, te ličij puáhtám leđe ahheev čuávvuđ paaldâst. Tääl mun lijjim kale viehâ tuđâvâš, ete ij tarbâšâm jieš vyeijiđ – vyeijeeh lijjii uáli njuoskâm.
Ko ovdil oholoopâ lijjii lihmáduvah, te tot vaiguttij ubâ ohjelmân ennuv. Rađehân ij killám ko kištopeeivih algii, já lávurduv mij koolgâim maassâdkeessiđ puoh vyeijimijd eereeb kunâgâsjuávhu. Tot lâi kale korrâ sijvo poccuid, aaibâs siäbládâh.
Puátuseh vuosmuu peeivi maŋa lijjii váhá tego mij arvâlijm, já olâttâsah iä lamaš ennuv. Suoppâinkišto luhostui šooŋâst huolâhánnáá, já ulmuuh iä tarbâšâm leđe ohjelmttáá. Mun jiem jieš kiergânâm keččâđ kištoid. Toh lijjii-uv eres ääigi ko táválávt, ko tääl njuárustem lâi kaskoo kištopeeivi. Njuárustmist almai juávhu vyeittee lâi Lemet Eira já nisonijn Inkeri Magga.
Ehidist puoh kištoulmuuh vissâ tuoivuu, ete puolâštičij pasepeivi várás. Iijâ ääigi mun jieš lijjim ijjâvahtân poccui tiet, já mun pahudim, ete siämmáálágán peivi ličij puátimin. Kyevti kilomeetter rađe lâi mielâttes hyenes oornigist.
Mun jiem kal tuostâm jurdeđgin, maggaar tuámmárhommá oholoopân šodâččij, ko lopedim toos älgiđ. Tot lâi munjin mudoi-uv ereslágán pargo puásuikišto pirrâsist, ko mun lijjim kuittâg lamaš vyeijee 30 ihheed.
Pasepeeivi iđedist mij koolgâim meridiđ, maht tot vyeijim mana. Iäba tast lamaškin muulsâiävtuh ko mutteđ ohjelm váhá. Kunâgâskišto, mii lii ain lamaš pasepeeivi kyevti kilomeetter mätki, koolgâi uániduđ oovtâ kilomeetterân, já tom koolgâi vyeijiđ vuosmužžân. Taan ive kunâgâssân šoodâi Verneri, Miika Laurosii ergi Pintamo palgâsist, vyeijen Janne Alatalo. Verneri vuáittu lâi uccâ olâttâs, ige kihheen kale lamaš máttám tom ervidiđ ovdil kišto-oholoopâ. Jannen kunâgâsvuotâ lâi vuosmuš olmâ kunâgâsvuotâ.
Kunâgâsjuávhu maŋa Silver race -poccuuh vuoijii sprinttimääđhi. Tom vuoitij Juha Mikkola Lämpäri Ivalo palgâsist, vyeijen Elias Tervaniemi.
Marko Tervaniemi
Koveh: Marko Tervaniemi (rađe) já Henna Tervaniemi (eres koveh)