Tutkâmjuávkku luhostui kuvviđ Pseudoliparis-suuhân kullee njamokyele Kuálhismeerâst 8 336 meetter kieŋŋâlvuođâst – kieŋâlub saajeest ko kuássin ovdil. Oovdiš ulâttâs lâi kyele kuvvim Mariaanij häävdist 8 178 meetter kieŋŋâlvuođâst.
Njamokyeli kovvejui kameravuáháduvváin, mii luoštui Izu–Ogasawara kááivun Jaapaan máddáábeln. Uárji-Australia ollâopâttuv professor, Minderoo-UWA Kieŋâlismerâtutkâmuškuávdáá vuáđudeijee Alan Jamieson mield kyeli lii uáli alda ponemuu kieŋŋâlvuođâ, kost kyeleh pasteh cevziđ.
– Jis taan ulâttâs rikko, te tot rikkuuččij het-het, kenski moddijn meetteráin, Jamieson iätá BBC:n.
Maailmist láá paijeel 300 njamokyelišlaaijâd. Stuorrâ uási tain eelih cuávis čácáduvâin, mut motomeh láá vuáhádum elimân Antarktis kolmâ čaasijn já robdâmuu teddust. Käävci kilomeetter kieŋŋâlvuođâst teedâ lii 800 kerdid stuárráb ko váldumeerâ čäsuáivist. Liivzâslágán roppâ iššeed njamokuolijd cevziđ taan vaigâdis pirrâsist. Nubenáál ko maaŋgâin eres kyelišlaajâin, njamokuolijn ij lah kooppâin, mast meid sátáččij leđe ävkki meerâi kieŋŋâlvuođâst. Ton lasseen njamokyeleh poreh smavvâ rapuelleežijd, moh kávnojeh valjeeht kieŋâlis váldumeerâst.
Käldeeh:
– Kala tallentui kameralle meressä syvemmällä kuin koskaan ennen historiassa (www.yle.fi)
– Deepest ever fish caught on camera off Japan (www.bbc.com)
Kove: A Owen (Pixabay)