Puáttee ive ij pyevti uuccâđ ollágin.
Nuorttâlâškielâst lii esken šoddâm uđđâ uáppuaamnâs Oulu ollâopâttuv Giellagas-instituutân. Anarâš aavis koijâdij ollâopâttâhmáttáátteijee Miika Lehtisiist, mii uáppuamnâsân tääl kulloo.
”Uáppuaamnâs uđâsmittoo vuáđulávt Oulu ollâopâttuvâst ive 2023. Taan räi ollâopâttuv válduamnâsvaljiimijn uáppeeh láá kolgâm jo ovddiist mättiđ nuorttâlâškielâ, mut čoovčâ 2023 rääjist uápuh älgih aalgâ rääjist. Taat lii uđđâ äšši. Nuuvtpa kii peri, kiäst lii máhđulâšvuotâ luuhâđ ollâopâttuvâst, puáhtá taan kiiđâ uuccâđ luuhâđ nuorttâlâškielâ válduamnâsin”, muštâl Miika Lehtinen.
Nubbe-uv äigikyevdilis äšši nuorttâlâškielâ uápuin lii taan kiiđâ:
”Tastko nuorttâlâškielâ máttááttâsnaavcah láá uccáá, nuorttâlâškielâ puáhtá uuccâđ luuhâđ Oulu ollâopâttâhân taan kiiđâ já čuávuváá tove esken kiđđuv 2025”, sun juátká já avžut-uv uuccâđ luuhâđ nuorttâlâškielâ eidu taan kiiđâ, jis juurdâš algâttiđ nuorttâlâškielâ uápuid. “Puáttee ive ij pyevti uuccâđ ollágin”, sun čielgee.
”Nuorttâlâškielâst láá tääl kuulmâs, kiäh aktiivlávt láá čođâlditmin totkos. Sierâvuoigâdvuođáin lohheeh láá meid motomeh, siämmáánáál meid sierânâs kuursâi lohheeh, kiäin mottoom kurssâ lii mottoom suujâ tiet pááccám čođâldithánnáá”, Lehtinen muštâl.
Kove: Fabrizio Brecciaroli