Aanaar SM‑kištoin kištoviehâ peesâi uáiniđ maaŋgâ valastâllee karrieer loopâ, ko áámmátlâš čuoigâm nuuvâi aainâs-uv Krista Pärmäkoskist, Katri Lylynperäst, Perttu Hyvärisiist já Markus Vuorelast. Juáháš täin Suomâ alemuu tääsi čyeigein uásálistii SM‑oholoopâ majemuu máátkán pasepeeivi 12.4.2026 Aanaar Juvduuväärist.
Almaah čuoigii 50 kilomeetterid já nisoneh 30 kilomeetterid ärbivuáválijn čuoigâmstijláin. Kištosaaveehlätteeh Juvduuväärist láá Suomâ, jis iä ubâ maailm, hástulumoseh. Aainâs-uv virgálávt, maid aalmugijkoskâsâš čuoigâm- já muotâlyevdilitto FIS (International Ski and Snowboard Federation) lii tuhhiittâm. Motomeh eteh, ete tuše Tour de Ski loppâvuástálâh, Alpe Cermis, lii vaigâdub. Juvduuväärist kalga vala čuoigâđ vuálus-uv. 50 kilomeetter kištoost čyeigeeh čyeigih pajas já vuálus ohtsis vittii já 30 kilomeetter kištoost kulmii.
Moolâst karrieeris lopâtteijee čyeigeid vuordii samppanjarišoh já poccuutyeljistoovlih. Šoŋŋâ lâi mielâttes fiijnes, já tubdâmušah čyeigein lijjii eromâš pyereh. Krista Pärmäkoski já kollemitalist Johanna Matintalo poođijn moolâviijve rasta kietâluvâi. Pärmäkoski ij čuoigâm majemuu määđhi hirmâd korrâsávt pic eenâb-uv navdâšemmieláin. Matintalo muštâlij kišto maŋa median, ete sunjin puoh tehálumos äšši já ulme peeivist lâi-uv tot, ete sun juvsâččij Krista já suái puávtáččáin puáttiđ siämmáá ääigi moolân.
Krista Pärmäkoski toolâi moolâst saavâ, mast sun kiijtij kištottâllâmkuoimijdis já avžui sii oskođ naharáid, mut irâttiđ navdâšiđ meid määđhist. Pärmäkoski lii lamaš ohtâ Suomâ nisonij njunoščyeigein. Sun lii vuáittám maaŋgâid mitalijd olympialijn já maailmmiäštárkištoin, ovdâmerkkân 30 km olympiasiilbâ ärbivuáválijn čuoigâmstijláin ive 2018 Pyeongchangist já 10 km olympiaproonsi ärbivuáválijn čuoigâmstijláin ive 2022 Pekingist. Pärmäkoski áigu čuoigâmkarrieeris maŋa älgiđ välmejeijen aainâs-uv Tiia Olkkosâžân, kote oovdâst Ylivieskan Kuula ‑seervi.
Hyvärinen: Innig jiem pyevti čäälliđ jieččân ámáttin njunošvalastâllee
Tego Pärmäkoski-uv, meid Perttu Hyvärinen vuolgij majemuu kiišton navdâšiđ. Hyvärinen eeđâi Anarâš aavisân kišto maŋa, ete suu tobdoh láá sehe iloliih já meid soroliih. Korrâsumos tobdoh monnii jo Salpausselkä maailmcupist njuhčâmáánust. Sun eeđâi meid, ete lii váhá vaigâd ko lii ain čáállám jieijâs ámáttin ”njunošvalastâllee” já tääl ij pyevti innig ettâđ tom, pic sun kalga keksiđ maidnii muide. Tot taha identiteetkriisâ.
50 kilomeetter kišto lâi Hyvärisii mielâst ton verd koorâs, ete sunjin ij šoodâ aaibâs tállân ahheev kištottâlmân. Čuoigâmist Hyvärinen muštâlij, ete sun lii ain halijdâm leđe vuoigâlâš já väldiđ ulmuid huámášumán. Nuuvt sun poorgâi Anarist-uv já ovdâmerkkân savâstâlâi ulmuigijn kaskoo čuoigâm. Sun eeđâi, ete taggaar ko sun lii čuoigâmist, te siämmáálágán sun lii meid olmâ elimist. Hyvärinen lii meid ain halijdâm pyehtiđ huumor valastâlmân.
Hyvärisii merhâšittee juvsoh láá ovdâmerkkân kulmâ nuorâi MM‑proonsi ive 2011 Otepääst, MM‑viestâsilbâ ive 2023 Planicast já maailmcup uásikišto vuáittu Tour de Ski Toblachist ive 2023.
Katri Lylynperä já Markus Vuorela lává lamaš kuhháá njunoščyeigeeh Suomâ aalmuglii tääsist. Kuohtuuh lává kištokarrieeris ääigi peessâm maailmcupist love pyeremuu juávkun. Vuorela jooskâi jieijâs čuoigâmkarrieer fiskisliivi pajalist adai Suomâ Cup vyeitten. Meid sun navdâšij kištoost Anarist. Vuorelast lii nubbe karrieer räjialmajin, já täst ovdâskulij sun vuáju toos piäiválávt. Lylynperä vist juátká jieijâs uápuid vuosâišetipšon.
Käldeeh:
– ”Hiihtoeläkeläiset” nautiskelivat maalissa: ”Illalla korkkareita jalkaan” (yle.fi)
– Inarin SM-hiihdoissa on Suomen oloissa poikkeuksellisen haastava latu: ratatarkastaja nostaa hattua maaliin päässeille (yle.fi)
– Krista Pärmäkoski (www.fis-ski.com)
– Perttu Hyvärinen (www.fis-ski.com)
Artikkâlkove: Henna Tervaniemi