Euroop komissio lii nomâttâm Jyrki Kataisii EU já arktisii kuávlu koskâsâžžân eromâšrävvejeijen. Koččâmušâst lii kuuđâ mánuppaje kukkosâš luáttámušpargo, mon Katainen hoittáá siämmáá ääigi jieijâs pargoin Nordea ohtsâškoddekoskâvuotâhovdân. Kataisii ovdâsvástádâssân lii smiettâđ, maht EU puáhtá nanosmittiđ torvolâšvuođâ já ekonomisii tile arktisii kuávlust já ton jeessânstaatâin. Sun uásálist meid EU arktisii strategia peividmân. Paargon kulá ohtsâšpargo arktisii kuávlu haldâttâsâiguin, EU jeessânstatâiguin já eres kuávdáš juávhuiguin.
– Euroop já siämmást arktisii kuávlu torvolâšvuođâ nanosmittem lii eidu tääl kuávdáš äšši staatáid, irâttâssáid já toi äššigâssáid. Lii positiivlâš, ete EU ocá uđđâ vuovijd torvolâšvuođâ já kilelis ovdánem oovdedmân arktisii kuávlust. Tággáár rävvejeijee roolâ lii tiäđust-uv stuorrâ kunnee, já vuárdám moovtâ pargo algâttem, Katainen eeđâi.
Pargo álgá tállán já pištá kuttâ mánuppaje. Jyrki Katainen lii porgâm Nordeast ive 2023 roovvâdmáánu rääjist. Ovdil tom sun poorgâi politiikist. Vistig-uv sun tooimâi Suomâ staatâvarijministerin iivij 2007–2011 já Suomâ njunošministerin iivij 2011–2014. Taan lasseen sun tooimâi Euroop komissio värisaavâjođetteijen já komissaarin paargon, stuárumân, investistmân já kištottâllâmnavcâlâšvuotân kyeskee ašijguin iivij 2014–2019.
Käldee:
– Nordean yhteiskuntasuhdejohtaja Jyrki Katainen nimitetty EU:n ja arktisen alueen erityisneuvonantajaksi (www.nordea.com/fi)
Kove: Gianfranco Nitti