Orion-komovuotâskiijpâ lii juksâm Mánudáá juurrâmrađe. Majebaargâ tijme 2.02 Suomâ ääigi tot juuđij puoh enâmustáá kukkenorroo saje peht Enâmist kejâdijn. Rakkeet kirdá Mánudáá pirrâ, já tastoo tot kirdá maassâd Enâmân. Rakkeet paččui mánudâšmáátkán koskoho 1.4. tijme 18.35.12 EDT ađai tijme 01.35.12 Suomâ ääigi tuorâstuv. Mätki pištá suullân love pirrâmpeivid.
Astronauteh láá muštâlâm Enâmân jieijâs fiäránijn määđhi ääigi. Vistig sii mielâst lii lamaš eromâš uáiniđ ubâ Eennâm já ton kuohtuid naavijd siämmáá ääigi. Artemis II kirdee Victor Glover muštâl, et sii uáđđimpuudâ ääigi Eennâm lâi-uv paifakkist jo čuuvtij uccom já Mánudâš stuárrum. Määđhi ääigi Mánudâš stuáru ubâ ääigi já Eennâm ucco. 1960-lovo Apollo-kirdemijn Apollo 13 komendeijee Jim Lovell kuvvij tom tobdo oskomettumin, et Mánudáást kejâdijn ubâ Eennâm lâi nuuvt čuuvtij uccom, et tot čaavâi čiähusân suu peelgi vuálá.
Orion kiirdij vistig Eennâm juurrâmraađeest, mon ääigi rakkeet testajui pyereest ovdilgo tot paččui paijeelmiärálijn Translunar injektio ‑moottorpuáldimáin Mánudáá kulij. Taan puáldim maŋa komovuotâskiijpâst ij lah innig máhđulâš maccâđ Enâmân jurâhánnáá Mánudáá pirrâ.
Artemis II ij siäivu Mánudáá asan, pic tot váldá kuuvijd já totká eromâšávt Mánudáá sevŋis pele.
Teknisiih vädisvuođah
Teknisiih vädisvuođah taan kirdemmääđhi ääigi láá lamaš kuohtii komovuotâskiijpâ hiivsigáin. Piegguuttempoccei paasij kuittâg mottoom verd kužžâ, mii jiäŋui. Lávvárduv kirdemkocceem meridij, et vädisvuođâ puávtáččij iskâđ čuávdiđ jorgeetmáin komovuotâskiijpâ toin naalijn, et jiäŋŋum poccee ličij Piäiváá kulij. Piäiváš lieggij tommit, et jiäŋŋum poccee lekkâsij uásild, já Orion luoštij uási kuužâst komovuotân.
Maŋeláá toppâlum poccee kuorrim luhostui pyereest. Kirdemstivrim almottij, et hiivsig puovtij vuod kevttiđ táválávt.
Maccâm Enâmân
Orion kolgâččij maccâđ Enâmân cuáŋuimáánu lovváád peeivi. Tot kolgâččij koččâđ Kuálhismeerân.
Käldeeh:
– Artemis II (www.nasa.gov)
– Artemis II Flight Day 5: Correction Burn Complete (www.nasa.gov)
Kove: Reid Wiseman / NASA
Uuđâs tivvum 7.4.2026 tme 9.07: Skiijpâ juuvsâi puoh enâmustáá kukkenorroo saje majebaargâ tijme 2.02 ige vuossaargâ tijme 14.07.