Suomâ Piäluštâsvyeimih uásálisteh Nato Cold Response 26 ‑hárjuttâsân, mii uárnejuvvoo Suomâ, Ruotâ já Taažâ taveoosijn. Hárjuttâs aalgij jieht, já tot pištá ain njuhčâmáánu 20. peeivi räi.
Hárjuttâsân uásálisteh ohtsis 25 000 suáldáttid 14 enâmist. Suomâ peln hárjuttâsâst láá fáárust 7 500 suáldáttid, kiäin suullân 3 500 láá Suomâst já suullân 4 000 puátih Ruotâst, Ranskaast, Italiast, Stuorrâ-Britanniast já Ovtâstum staatâin.
Suomâst hárjuttâs uárnejuvvoo iänááš Rovajärvi pääččimkuávlust Ruávinjaargâ já Suáđigil kooskâst. Juávhui jotteem vaaigut jotolâhân eromâšávt Maadâ-Laapist 9.–11. peeivi já 19.–21. peeivi, mutâ juávhuh joteh meiddei eres aaigij já soojij. Piäluštâsvyeimih avžuutteh, ete ulmuuh värideh mađhijd eenâb ääigi já vyejih várugávt stuorrâ juávkku-uásáduvâi alda.
Hárjuttâs naanood Nato ohtsâšpargo tavekuávluin
Cold Response 26 ‑hárjuttâs ulmen lii nanodiđ Nato tavekuávlui piäluštem, testađ ohtsâštooimâ vädis tiilijn sehe hárjuttâllâđ littolâšjuávhui vuástáväldim já logistiik.
– Taat lii mijjân ive tehálumos hárjuttâs meid logistiik já iššeedeennâm adelem torjuu hárjuttâllâm uáinust. Mij taibâp jo pyereest oohtân puoh hárjuttâsâst miiguin tuáimee juávhuiguin, mutâ taistâlem puáhtá älgiđ esken ton maŋa ko juávhuh láá finnejum kuávlun. Tondiet lii tehálâš hárjuttâllâđ juávhui njyebžilis já torvolâš čokkim tälviv, čielgee Eennâmvuoimij taistâlemhárjuttâs hovdâ eeveerst Marko Kivelä.
Cold Response 26 lii uási Arctic Sentry ‑haavâst, mon ulmen lii nanodiđ Nato mieldiorroom já naavcâid arktisii kuávlust. Haavâ toimâ jođettuvvoo Norfolkist Ovtâstum staatâin.
Käldeeh:
– Puolustusvoimat ja liittolaiset harjoittelevat arktista puolustusta Cold Response 26 -harjoituksessa (puolustusvoimat.fi)
– Cold Response 26 -harjoituksessa operoivat 7500 sotilasta näkyvät liikenteessä (puolustusvoimat.fi)
Kove: Piäluštâsvyeimih