Improjuávkku Kriisâsuohâd fáálá oovdânpyehtimijd já pargopaajijd juovlâi ääigi. Juovlâjuhlijd já eres tábáhtussáid uáivildum ohjelm lii kiäsuttâm pyereest aanaarlijd.
Improvisaatioteatterjuávkku Kriisâsuohâd (suom. Kriisipuuro) fáálá suotâs ohjelm juovlâi ääigi juhlijd já tilálâšvuođáid. Kriisâsuohâd lii kuulmâ aanaarlii teatteráámmátlii juávkku, moos kuleh Heli Huovinen, Kaisa-Maria Poikela já Jenni Parviainen. Juávkku fáálá oovdânpyehtimijd suomâ‑ já eŋgâlâskielân sehe pargopaajijd suomâ-, eŋgâlâs-, anarâš‑ já orjâlâškielân.
– Ulmuuh láá lamaš perustum mii tooimâst. Seervij já pargosiärvusij lasseen ovtâskâs ulmuuh halijdiččii peessâđ uáiniđ mii oovdânpyehtimijd, te mij lep tääl ucâmin ääigi já saje toos, muštâl Parviainen.
Áinoošlajâsiih oovdânpyehtimeh
Improvisaatioteatter meerhâš tom, ete oovdânpyehtimist ij lah kietâčaalâ, já tondiet jyehi oovdânpyehtim lii áinoošlajâsâš. Keččeeh pyehtih vaiguttiđ oovdânpyehtimân ovdâmerkkân addelmáin tábáhtumesoojijd teikkâ vuárusaanijd. Impropargopaajijn vist uásálisteeh pyehtih uápásmuđ jieškote-uvlágánij hárjuttâsâi pehti improteattermaailmân. Hárjuttâsah heivejeh puohháid, iäge uásálisteeh taarbâš oovdeb hárjánem teatterist.
Jis tun lah perustum oovdânpyehtimijn tâi pargopaajijn, te vääldi ohtâvuođâ čujottâsân inariimprot@gmail.com. Tun kaavnah mii meid Instagramist noomáin @improryhmakriisipuuro já Facebookist noomáin Inarin improteatteri.
Kriisâsuohâd
Kove: Khalid Imran