Máttááttâs‑ já kulttuurministeriö lii mieđettâm vuosmuid vittâ ornimlove eŋgâlâskielâg luvâttâhškovlim orniimân. Loveh mieđettuvvojii Jyväskylä škovlimkoddeovtâstume Gradian sehe Helsig, Oulu, Pori já Tampere kaavpugáid. Ornimloveh kyeskih Helsig kielâluvâttâhân, Jyväskylä Lyseo luvâttâhân, Oulu Lyseo luvâttâhân, Pori luvâttâhân já Tampere Pyynikki luvâttâhân.
– Uđâsmittem ulmen lii nonniđ Suomâ hogâttetteevuođâ aalmugijkoskâsij tuáimei já maassâdvärrejeijei juávhust. Uđâsmittem pyereed meid hyeneeht suomâkielâ teikâ ruotâkielâ mättee uáppei čuovviittâslijd vuoigâdvuođâid, iätá máttááttâsminister Anders Adlercreutz.
Eŋgâlâskielâg pajeuáppeetođhos lii uáivildum tagaráid uáppeid, kiäi kielâmáttu ij lah tuárvi pyeri luvâttâhškovliittâs já pajeuáppeetotkos čođâlditmân suomâkielân teikâ ruotâkielân. Viereskielâlijn uáppein váttoo págulâžžân eenikielâ já kirjálâšvuođâ iskosin ”suomâkielâ teikâ ruotâkielâ nubben kiellân já kirjálâšvuotâ” ‑iskos.
Eŋgâlâskielâg luvâttâhškovlim álgá porgemáánust 2026. Taat škovlim kuáská jyehi ive ohtsis suullân 200 uáppei.
Vuosmuu tove eŋgâlâskielâg pajeuáppeetotkos puáhtá čođâldittiđ čohčuv 2028.
Käldee:
– Englanninkielinen lukiokoulutus alkaa elokuusta 2026 (okm.fi)
Kove: Estormiz (Wikimedia Commons)