Meccihaldâttâs kuálástemlopekuávloid puátih nubástusah. Viiđâ vijđes stággulopekuávlust šaddeh 52 uđđâ lopekuávlud. Ton lasseen motomeh pivduslopekuávluh räijejuvvojeh uđđâsist. Uđđâ kuávloid puáhtá uápásmiđ Eräluvat.fi-siijđoin (suomâkielân). Nubástusah puátih vuáimán ive 2026 aalgâst.
Uđđâ lopekuávluh čuávuh kyelituálukuávlui raajijd já noomâid. Suomâst láá ohtsis 118 kyelituálukuávlud, moh rähtih kuávlusis kevttim‑ já tipšomvuávám, mii kuáská puoh čäcikuávlui omâsteijeid. Tot, ete uđđâ lopekuávluh láá kyelituálukuávlui miäldásiih, iššeed miärádâsâi tohâmist. Ucebij kuávlui áánsust lii meid älkkeb čuávvuđ kyelinaalijd já kuálástem.
– Nubástus tahhoo kuolij iävtuiguin. Tááláá ääigi kuálástem stivrejuvvoo kyelituálukuávlui mield. Ovdâmerkkân pivdemmitoi raijiittâsah kyeskih ain tiätu kyelituálukuávlun. Lii ennuv älkkeb, ete mii kuálástemčuosâttâh kuorâd siämmáid raajijd já ete toos kyeskih siämmááh njuolgâdusah, seelvât kuálástem njunošäššitobdee Olli Urpanen Meccihaldâttâsâst.
Nubástus ij vaaigut uccâ, oovtâ saje lopekuávloid ige tagaráid ohtsâšlopekuávloid, main láá sehe staatâ já priivaatulmui čääsih.
Uđđâ lopekuávluin uážžu kuálástiđ ive 2026 rääjist. Loveh puátih vyebdimnáál 16.12.2025. Jis haalijd uástiđ vala ive 2025 pivdusluuvijd já vijđes stággukuávlui luuvijd, te taid kalga uástiđ majemustáá 30.11.2025.
Käldeeh:
– Kalastuslupa-alueet uudistuvat: tutustu muutoksiin! (www.eraluvat.fi)
– Mediatiedote: Kalastuskohteiden rajat muuttuvat valtion vesialueilla (www.eraluvat.fi)
Kove: Couleur (Pixabay)