Forgâ juovlâi vyerdim lii älgimin, já ton mield meid muččâdumos juovlâlavluuh čuojâškyetih oppeet kuulmâ sämikielân pirrâ Suomâ. Suomâ evaŋgellâš-luuteerlâš kirkko tieđeet, ete Muččâdumos juovlâlavluuh ‑tábáhtusah uárnejuvvojeh taaijuv Sämieennâm lasseen meiddei kuuđâ kaavpugist Säämi ulguubeln:
- 27.11. Tuurku tuámukirhoost tme 19
- 28.11. Tamperest Aleksanteri kirhoost tme 18
- 29.11. Helsig tuámukirhoost tme 14
- 30.11. Oulust Karjasilta kirhoost tme 15
- 8.12. Ruávinjaargâ kirhoost tme 18
- 13.12. Jyväskyläst Keltinmäki kirhoost tme 18.
Täin tábáhtusâin piäsá lávluđ uápis juovlâlavluid tavesämikielân, anarâškielân já nuorttâlâškielân.
Jis ij maašâ vyerdiđ, te Ruávinjaargâ servikodde lii pyevtittâm video, mii lii kovvejum Suáđigil kirhoost. Videost kulloo ”Sámi juovllat” ‑laavlâ, mon lává lávlum Aimo Aikio já Petra Magga-Vars. Video puáhtá keččâđ tääbbin.
Ton lasseen skammâmáánust lii almostum tavesämikielâg juovlâlaavlâ ”Čuovgga urbi”. Laavlâ lii mieldi ive 2022 almostum Muččâdumos juovlâlavluuh ‑vihkoost, já tääl tot lii vuossâmuu keerdi kuullâmnáál päddejum häämist. Pittá ovtâstit moodeern muusik heiviittâs já ärbivuáválii juáigus. Lavluu lii nuottim Ánnámáret, já ton saanijd lii čáállám Inger-Mari Aikio. Lávlon lii aanaarlâš Káren Maria Näkkäläjärvi, já fáárust juoigâmin lii meid lavluu nyettejeijee Ánnámáret.
Muččâdumos juovlâlavluuh ‑tábáhtusah láá uási Suomâ Vuolgâttâsseervi ärbivuáválii kampanjast, moin tuárjojeh párnááh já sii vaanhimeh maailmist.
Käldee:
– Saamenkieliset Kauneimmat Joululaulut kutsuvat yhteiseen juhlaan (evl.fi)
Kove: neelam279 / Frauke Riether (Pixabay)