Louvre-museost roovvâdmáánust tábáhtum čiŋŋârievedem ohtâvuođâst láá tääl valdum kiddâ ohtsis oovce olmožid. Vistig valduin kiddâ kyevtis vuossaargâ roovvâdmáánu 27. peeivi já ton maŋa vala viiđâs koskoho roovvâdmáánu 29. peeivi. Kuálmád kiddâväldim tábáhtui lávvárduv skammâmáánu 1. peeivi. Ohtâ kiddâ valdum ulmuin lii tääl luoštum rijjâ. Poolis koijâdâlmeh juátkojeh. Ohtâ almain sujâttuvvoo rievedem olášutmist oovtâst kulmáin eres almain. ”DNA-tuođâštus čana suu rieveedmân”, Pariisi njunošsujâtteijee Laure Beccuau čielgee. Iärásij rooli ij lah vala čielgâs, mut Beccuau vuárdá, et kiddâ valdum almaah muštâleh eenâb tast, maht tábáhtumeh láá ovdánâm.
Beccuau muštâlij, et vistig kiddâ valdum kyevtis lává uásild mieđettâm jieijâs uási rieveedmân. Sun ij kuittâg čielgim detaljijd tast, maid suoi lává muštâlâm.
Poolis já sujâtteijeelágádâs láá ettâm, et Louvre nelji rievedeijee láá máhđulávt finnim iše meid iärásijn. Tondiet lii máhđulâš, et lase kiddâväldimeh láá puátimin. Máhđulávt rievedem lii lamaš tiilájum pargo.
Neelji almaa juávkku rievedij pasepeeivi roovvâdmáánu 19. peeivi kaskoo peeivi vuálá käävci minuttist maaŋgâid árvučiiŋâid Louvrest. Sij pessii siisâ museon varrimhissijn, mii lâi Beccuau mield suáládum oho ovdil rievedem. Suáládum čiiŋâi árvu lii áárvu mield nyevt 88 miljovn eurod.
Njunošsujâtteijee mield čiiŋah iä lah vala kavnum.
Pariisi poolishovdâ muštâlij seenaat kulâmijn, et museo torvolâšvuotâ ij lam oornigist. Suu mield puárásmâm systeemeh já hitásávt ovdáneijee tivvoompargoh tovâttii hiäjus soojijd Louvre torvolâšvuođâ kocemân. Meiddei museo hovdâ Laurence des Cars lii tolebiššáá mieđettâm, et museo videokocemist lijjii stuorrâ vááijuvvuođah. Sun muštâlij, et sun lâi vaalmâš iärániđ pargostis, mut suu iäruánumâš ij tuhhiittum.
Käldeeh:
– Nog eens vijf aanhoudingen voor juwelenroof in het Louvre (nos.nl)
– Franse justitie: gedeeltelijke bekentenis verdachten juwelenroof Louvre (nos.nl)
– Gestolen kroonjuwelen uit het Louvre waren zo’n 88 miljoen euro waard (nos.nl)
– Twee verdachten opgepakt voor spectaculaire juwelenroof in het Louvre (nos.nl)
– Two new suspects handed preliminary charges in Louvre jewels heist case, Paris prosecutor says (apnews.com)
Kove: Asticoco (Wikimedia Commons)