Ranskalâš media muštâl, et Louvre-museo Pariisist lii sirdám jálukeđgijdis Ranska kuávdášpaaŋki hoolvin pajeláhháá okko tassaaš (19.10.) tábáhtum ruokkâdis rievedem maŋa. Jálukeeđgih sirdojii syele čovgâ torvotoimâigijn.
Museo já kuávdášpaŋkki iä muštâl operaatiost olgoskulij, mut käldei mield jálukeeđgih iä čaittuu museost ovdil ko ton torvolâšvuotâ lii pyeredum.
Rievedeijeeh kevttii varrimhiisi pajaspuátimân, čuoppii pajekeerdi laasâ meddâl já pottii siisâ museo Apollo-salin, kost siäiluttuvvoo ovdâmerkkân árvugâs Mona Lisa ‑tavlu. Rievedem piištij tuše motomijd minuttijd. Áárvu mield rievedeijei tuálvum saallâs árvu lii suullân 88 miljovn eurod. Suáládum čiiŋah kullii Ranska kiäisárperrui čuágáldâhân. Suolluuh tolvuu eereeb iärrás tivrâs saafiirtiara, smaragdčevečiiŋâ já tiimaantraddenáálu. Louvre-museo hovdâ Laurence des Cars iätá, et museo ij huámášâm rievedeijeid tuárvi tooláá.
Patârem ääigi rievedeijeeh kočâttii kiäisárroonnig Eugénie kruuvnâ, mii cuovkkânij ton ohtâvuođâst. Tábáhtus lii hiämáskittám ulmuid, tastko laasâ, mon peht rievedem tábáhtui, paasij torvokamerai vahtim ulguubel.
Rieveedmist šeštum aarnij suojâlem tiet Louvre-museo siirdij taid kuávdášpaaŋki hoolvin, mii lii tuše mottoom čyeđe meetter keččin museost.
Käldeeh:
– Cambriolage du Louvre: une partie des bijoux non volés a été transférée à la Banque de France (www.bfmtv.com)
– Directeur Louvre: cameratoezicht voldeed niet bij juwelenroof (nos.nl)
Kove: Boubloub (Wikimedia Commons)