Kiinast lii valdum anon maailm alemus šalde. Uđđâ šalde lii Huajiang Grand Canyon Bridge, mii hiäŋgáá juhâleevist 625 meetter aloduvvâst. Taat lii suullân kuohtii Eiffel-toornâ alodâh. Šaldeest láá ”jiärmáliih kaabeleh”, moh ubâ ääigi mittedeh kelduu, liegâsvuođâ já lahtâvuođâ.
Šalde huksim Guizhou provinsist lii pištám kulmâ ive. Kiina staatâtelevisiost láá čaittum koveh tast, maht vuosmuuh autoh vyejih šalde keejist kiäčán. Šalde lii 1 420 meetter kukkosâš. Huksimproojeekt tehelumos ulmen lii lamaš ulmui mađhâšemääigi uánidem. Tääl riddoost nuubán vuájá kyevti minuttist, ige mätki innig pište kyehti tiijme tego ovdil. Vyerdimist lii, et máátkán kevttum ääigi uánánem virkosmit meid kuávlui ekonomia.
Kiina staatâmediatoimâttâh Xinhua mield masaba peeli maailm ollâgumos šooldijn láá Guizhou provinsist. Tääl uđđâ šalde váldá ulâttâs Beipanjiang-šaldeest, mii lii siämmáá provinsist 565 meetter aloduvvâst.
Kiina staatâmedia mield uđđâ šalde vissásávt kiäsut meid turistijd. Tääl šalde oovtâ pilarist lii hissi, main piäsá 200 meetter alodâhân. Tobbeen puáhtá benjinjuškiđ já meid njuškiđ siäivumsuojijn.
Käldee:
– Hoogste brug ter wereld geopend in China (nos.nl)
Kove: Glabb (Wikimedia Commons)